Deficiti tregtar i Kosovës shkon në 544 milionë euro, pse rritja e eksporteve s'mjafton?

PRISHTINË — Agjencia e Statistikave të Kosovës (ASK) ka publikuar të dhënat e tregtisë së jashtme për muajin maj 2026. Sipas njoftimit për media, eksportet e mallrave arritën vlerën 94,1 milionë euro, me rritje prej 15,7 për qind krahasuar me majin e vitit 2025, ndërsa importet u rritën me 5,6 për qind, duke arritur 638,6 milionë euro. Eksporti mbulon importin me 14,7 për qind.

Të dhënat tregojnë për një rritje të deficitit tregtar prej 4,0 për qind, duke arritur 544,4 milionë euro krahasuar me 523,4 milionë euro në maj 2025. Kosova importon gati 6.8 herë më shumë se sa eksporton.

Në lidhje me strukturën e eksporteve, 27,5% e përbëjnë metalet bazë dhe artikujt prej tyre, 11,1% plastika, goma dhe artikujt prej tyre, 10,7% ushqimet e përgatitura, pijet dhe duhani, 8,9% artikujt e ndryshëm të prodhuar, dhe 8,0% produktet minerale. Për importet, 15,2% e përbëjnë produktet minerale, 12,6% ushqimet e përgatitura, pijet dhe duhani, 12,0% makineritë, pajisjet mekanike dhe elektrike, 11,7% mjetet e transportit, dhe 10,8% metalet bazë dhe artikujt prej tyre.

Eksportet në vendet e BE-së arritën në 30,8 milionë euro, ose 32,7% e eksporteve të përgjithshme, me një rritje prej 6,3%. Partnerët kryesorë ishin Gjermania (9,9%), Italia (4,9%) dhe Holanda (2,7%). Importet nga BE-ja ishin rreth 301,3 milionë euro, ose 47,2% e importeve të përgjithshme, me një rritje prej 13,7%, me pjesëmarrje të lartë nga Gjermania (13,1%), Italia (8,8%) dhe Polonia (4,1%).

Eksportet me vendet e CEFTA-s arritën në 43,1 milionë euro, ose 45,7% të totalit, me rritje prej 24,6%. Partnerët kryesorë ishin Maqedonia e Veriut (16,4%), Shqipëria (14,8%), Mali i Zi (6,6%) dhe Serbia (6,4%). Importet nga CEFTA arritën në 85,3 milionë euro, ose 13,4% e totalit, me rritje prej 22,5%, me pjesëmarrje më të lartë nga Maqedonia e Veriut (4,9%), Shqipëria (4,1%) dhe Serbia (3,2%).

Eksportet me vendet e tjera arritën në 20,3 milionë euro, ose 21,6%, me partnerë kryesorë Zvicra (10,6%) dhe Turqia (4,5%). Importet nga këto vende arritën në 252,0 milionë euro, ose 39,5%, me domenim nga Kina (12,2%) dhe Turqia (13,9%).

Burim: Gazeta Express
— Redaksia ZHURMA