Cilat janë 5 kërkesat e panegociueshme pas 23 ditësh protestë?

TIRANË — Në ditën e 23-të të protestave, grupi koordinues doli me deklaratën e parë të plotë, duke bërë publike pesë kërkesat kryesore drejtuar qeverisë së Edi Ramës. Deklarata u lexua nga Dritan Goxhaj, ish-luftëtar i UÇK-së, i autorizuar nga grupi koordinues të flasë në emër të organizatorëve dhe protestuesve.

Kërkesa e parë — dhe ajo që grupi e quan "të panegociueshme" — është dorëheqja e Kryeministrit Edi Rama dhe e të gjithë qeverisë. Pika e dytë parashikon krijimin e një qeverie teknike tranzitore, jopartiake, me mandat të kufizuar 12-mujor.

Pika e tretë kërkon ndryshime kushtetuese: barazi e plotë e qytetarëve para ligjit dhe miratim me referendum popullor. Ndryshimet parashikojnë ristrukturimin e Kodit Zgjedhor, ndryshimin e ligjit për financimin e partive dhe kufizimin e mandateve të kryeministrit në jo më shumë se dy mandate gjatë gjithë jetës politike.

Kërkesa e katërt kërkon anulimin e ndryshimeve në ligjet për "Zonat e Mbrojtura" dhe "Trashëgiminë kulturore", si dhe shfuqizimin e paketës ligjore të njohur si "Paketa e Maleve" dhe të statusit e kuadrit ligjor për "Investimet Strategjike".

Pika e pestë parashikon hartimin e një kontrate të re sociale mes qytetarëve dhe shtetit, pas konsultimit me intelektualë, ekspertë teknikë dhe qytetarë apartiakë të propozuar nga sheshi i protestës. Goxhaj u drejtua protestuesve: "Këto janë kërkesat tona të qarta, legjitime dhe të panegociueshme, të dala nga zëri i qytetarëve dhe nga vullneti i sovranit."

Pas 23 ditësh rezistencë paqësore, protesta nuk po kërkon vetëm largimin e Ramës — po propozon një arkitekturë tjetër politike, me ndryshime kushtetuese, referendum dhe qeveri jopartiake.

Burim: Tetova Sot
— Redaksia ZHURMA