Moisi Habilaj arrestohet në një beach bar në Borsh
Ku fshihej prej kohësh i dënuari nga drejtësia shqiptare dhe italiane dhe si u organizua operacioni për kapjen e tij?
BORSH — Moisi Habilaj është arrestuar mbrëmjen e sotme në Borsh gjatë një operacioni të zhvilluar nga strukturat e Policisë së Shtetit. Habilaj, i cili ishte shpallur në kërkim për trafik të lëndëve narkotike, është lokalizuar në një lokal plazhi në pronësi të familjarëve të tij, ku qëndronte prej kohësh.
Sipas burimeve pranë hetimit, arrestimi është kryer nga forcat e Operacionales së Tiranës. Këto forca, pas informacioneve të siguruara dhe përdorimit të metodave speciale të hetimit, bënë të mundur identifikimin e vendndodhjes së tij dhe rrethimin e zonës ku qëndronte i kërkuari.
Në momentin e arrestimit, Habilaj ishte i maskuar me një kapele dhe mjekër. Sipas të njëjtave burime, ai e mbante këtë maskim në përpjekje për të shmangur identifikimin e tij nga autoritetet, ndërsa qëndronte në lokalin e plazhit të familjarëve të tij në Borsh.
Ai është shpallur fajtor nga GJKKO me 10 vite burgim për trafik narkotikësh dhe pjesëmarrje në grup të strukturuar kriminal. Gjithashtu, Moisi Habilaj është dënuar më herët edhe nga drejtësia italiane me 15 vite burg për trafik ndërkombëtar droge.
Burim: ABC News
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.