Eda Kaliqi fiton vendin e parë në X Dance Festival të Shkupit

SHKUP — Balerina Eda Kaliqi fitoi Vendin e Parë në X Dance Festival, njëri nga festivalet më të rëndësishme ndërkombëtare të vallëzimit në Maqedoninë e Veriut. Paraqitja e saj u dallua mes konkurrentëve dhe solli një rezultat krenarie për baletisten e re shkupjane.

Duke folur për emocionet e fitores, Kaliqi tha se momenti kur dëgjoi emrin e saj si fituese ishte i papërshkrueshëm: "M'u kujtua çdo orë e kaluar në sallë, çdo stërvitje, çdo lodhje, çdo sakrificë dhe çdo sfidë që kam kaluar për të arritur deri këtu."

"U ndjeva përsëri si Eda e vogël, me të njëjtin emocion dhe gëzim," shtoi ajo. Triumfin nuk e cilësoi vetëm fitore, por "shpërblimin e gjithë përkushtimit dhe dashurisë" ndaj vallëzimit — "një ndjenjë e paharrueshme që do të mbetet përgjithmonë e gdhendur në zemrën time."

Sa i përket formulës së suksesit, Kaliqi theksoi kombinimin e talentit, punës dhe guximit. "Talenti më ndihmoi të filloj, puna më bëri të përmirësohem, ndërsa guximi më dha besimin për të dalë në skenë dhe për të dhënë maksimumin tim," shpjegoi balerina.

Mbështetja e familjes ka qenë, sipas saj, shtytja më e madhe. "Ata kanë qenë gjithmonë pranë meje, më kanë besuar dhe më kanë motivuar të vazhdoj përpara. Ndoshta pikërisht mbështetja e tyre ka qenë motivimi më i madh për të ndjekur ëndrrën time," tha Kaliqi.

Balerina shprehu dëshirën për të marrë pjesë në gara edhe më të mëdha: "Dua të vazhdoj të mësoj, të përmirësohem dhe të rritem çdo ditë. Shpresoj që në të ardhmen të përfaqësoj me krenari veten, familjen time dhe të gjithë ata që më kanë mbështetur në çdo hap të këtij rrugëtimi."

Meritë për këtë sukses ka edhe profesoresha Ilinka Nakova si dhe shkolla e baletit, për mbështetjen dhe udhëzimin e vazhdueshëm. Ky çmim, theksoi Kaliqi, është motivim i madh — nxitje për të mësuar dhe për t'u përmirësuar edhe më shumë.

Burim: Portalb
— Redaksia ZHURMA