Pse Ejupi e quan absurde idenë e Kurtit për gazin në Vlorë?

PRISHTINË — Eksperti i energjisë dhe drejtori ekzekutiv i Institutit për Politika Zhvillimore (INDEP), Burim Ejupi, e ka cilësuar si tërësisht absurde deklaratën e kryeministrit në detyrë, Albin Kurti, lidhur me projektin e gazit. Sipas tij, Kurti po jep premtime elektorale për investime në një shtet tjetër.

Ky reagim vjen pasi Kurti deklaroi se Qeveria e Kosovës planifikon të kyçet në projektin amerikan për gazin në Vlorë. Ky qëndrim bie ndesh me kërkesën e të ngarkuarës me punë në Ambasadën Amerikane, Anu Prattipati, për kyçje në Shkup të Maqedonisë së Veriut.

Ejupi sqaroi për 'Betimi për Drejtësi' se ky propozim nuk varet nga Kurti, sepse Shqipëria ka nënshkruar kontratat e saj dhe nuk ka nevojë për financim nga Kosova. Ajo mund të investojë vetë dhe t'ia shesë energjinë Kosovës sipas çmimit të tregut.

Ai e krahasoi këtë me premtimet e mëparshme për ndërtimin e hekurudhës në Sarandë, duke mos e kuptuar mendësinë e premtimeve për një shtet tjetër. Sipas tij, Shqipëria mund të jetë shtet mik, por ajo vendos krejtësisht vetë për financimet e saj.

Përveç kësaj, Ejupi ngriti alarmin për gasifikimin e thëngjillit, të cilin e cilësoi si një nga projektet më të rrezikshme mjedisore për vendin. Ai theksoi se ky proces dëmton rëndë ujërat nëntokësorë, në një kohë kur Kosova ka mungesa të mëdha ujore.

Drejtori i INDEP-it kritikoi edhe ish-deputetët e Vetëvendosjes, të cilët dikur protestonin në Shqipëri kundër hidrocentraleve, kurse sot heshtin para gasifikimit të thëngjillit. Ai u shpreh se ata e kanë futur kokën si struci në dhe përballë këtij rreziku të madh.

Kjo ide, sipas Ejupit, duket si përpjekje për të përdorur tema vetëm sa për të thënë diçka para zgjedhjeve. Ai e vlerëson si absurde që Kosova të premtojë investime në një shtet tjetër pa pasur asnjë marrëveshje apo kërkesë zyrtare nga pala shqiptare.

Burim: Lajmi.net
— Redaksia ZHURMA