Kush fshihet pas call-centerave të mashtrimit te Liqeni i Thatë?
A do të mbërrijë Prokuroria e Tiranës te pronari i dyshuar i rrjetit, apo çështja do të kufizohet tek administratorët formalë?
TIRANË — Dy të rinjtë e arrestuar si administratorë formalë të një call-centeri te Liqeni i Thatë janë vetëm pjesë e sipërfaqes së një rrjeti më të gjerë, sipas një investigimi të Report Tv. Pronari faktik i aktivitetit dyshohet të jetë biznesmeni Flladi Malaj, i njohur prej më shumë se 15 vitesh në këtë industri në Tiranë.
Lidhja me një operacion të mëparshëm të vitit 2023 përforcohet nga emri "Momentum" — i përdorur nga Policia e Shtetit atëherë, por që përkon me emërtimin e grupit të kompanive të krijuara dhe kontrolluara nga Malaj.
Dokumentet e QKB-së tregojnë një rrjet kompanish me aktivitet call-center: "Albreeze", "ACME Studio", "Casa Mokador" (më vonë "Eden Breeze"), "Mokador by Momentum", pastaj "Momentum Group", plus "Info Tirana", "Dekript Media Group" dhe "Akademia Profesionale M&G". Shumica janë regjistruar në të njëjtën adresë në Rrugën "Prokop Mima".
Sipas pretendimeve të publikuara, Flladi Malaj dhe vëllai i tij Xhulio Malaj — të përmendur si persona me lidhje familjare e shoqërore me figura politike e kriminale — dyshohet se kanë përdorur këto struktura për të mashtruar qindra qytetarë dhe biznesmenë të BE-së përmes platformave Forex, BrokerZ, Globalix, Bitcoin dhe skemave të tjera investimi. Mbetet për t'u parë nëse Prokuroria do të shkojë deri te organizatorët e dyshuar, apo çështja do të kufizohet sërish tek administratorët e arrestuar.
Burim: Report Tv, https://report.al/call-center-at-te-liqeni-i-thate-gjurma-qe-te-con-te-flladi-malaj/
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.