Çfarë ndryshon me 9 projektligjet që Ibrahimaj i dërgon BE-së?

TIRANË — Ministrja e Ekonomisë dhe Inovacionit, Delina Ibrahimaj, njoftoi se po avancon përafrimi i legjislacionit shqiptar me acquis të BE-së përmes një pakete prej nëntë projektligjesh. Reformat prekin fusha kyçe të ekonomisë dhe tregut, sipas deklaratës së saj për ATSH.

Paketa përfshin projektligje për shoqëritë tregtare, të drejtat e aksionarëve, regjistrin e biznesit, bashkimet dhe ndarjet ndërkufitare në Qendrën Kombëtare të Biznesit, grupimet ekonomike me interes europian, shoqëritë europiane të bashkëpunimit dhe marrjen nën kontroll të shoqërive me ofertë publike.

Ibrahimaj theksoi se ministria që drejton është institucioni lider në shtatë kapituj negociues me BE-në, bashkënegociatore në tre të tjerë dhe kontribuese në gjashtë kapituj. "Përafrimi me legjislacionin e Bashkimit Europian do të thotë më shumë siguri për bizneset dhe investimet, më shumë transparencë në treg dhe më shumë mundësi për zhvillimin ekonomik të vendit", u shpreh ajo.

Sipas ministres, reformat synojnë të forcojnë sigurinë juridike për bizneset, të rrisin mbrojtjen e konsumatorëve, të nxisin konkurrencën e ndershme dhe të mbështesin transformimin digjital. Ato vijnë si pjesë e angazhimit për të përshpejtuar anëtarësimin në BE — por pa datë konkrete për hapjen e kapitujve.

Burim: ATSH
— Redaksia ZHURMA