Pse po gjykohet në Zvicër TikTokeri që ofendoi Xhakën e Shaqirin?

SCHAFFHAUSEN — Në Zvicër ka nisur një proces të rëndësishëm gjyqësor ndaj influencuesit të njohur në TikTok, Mirco Casorelli, i cili akuzohet për diskriminim dhe nxitje të urrejtjes ndaj futbollistëve shqiptarë të përfaqësueses zvicerane. Procesi po zhvillohet në Gjykatën Kantonale të Schaffhausenit, pas një padie të ngritur nga Federata Zvicerane e Futbollit.

Casorelli, i cili njihet në rrjetet sociale me pseudonimin "Bireweich" dhe ka rreth 100 mijë ndjekës, kishte publikuar gjatë vitit 2024 video me shprehje tejet ofenduese ndaj yjeve të futbollit zviceran me prejardhje migrante. Mes lojtarëve të shënjestruar prej tij ishin Granit Xhaka, Xherdan Shaqiri, Jordan Lotomba, si dhe trajneri i ekipit, Murat Yakin.

Prokuroria e Schaffhausenit e kishte dënuar fillimisht influencuesin në vitin 2024 me një gjobë me kusht prej 10.800 frangash zvicerane, krahas një gjobë shtesë prej 2.700 frangash. Megjithatë, Casorelli nuk e pranoi këtë vendim dënimi dhe zgjodhi ta dërgonte çështjen për shqyrtim të plotë në gjykatë, duke këmbëngulur se komentet e tij ishin thjesht satirë.

Ndërsa vetë Casorelli pretendon para mediave zvicerane se e gjithë kjo ishte vetëm një parodi pa asnjë qëllim racist, prokuroria argumenton se ai ka tejkaluar kufijtë e lirisë së shprehjes. Sipas organit të akuzës, videot e tij i paraqisnin futbollistët si inferiorë për shkak të prejardhjes së tyre etnike, duke nxitur urrejtje në publik.

Aktualisht, TikTokeri po mbështetet financiarisht nga një organizatë që promovon lirinë e shprehjes, e cila ka marrë përsipër mbulimin e shpenzimeve të këtij procesi gjyqësor. Ky vendim gjykate pritet të sqarojë nëse deklaratat e tij mbrohen nga liria e shprehjes apo nëse ato përbëjnë diskriminim sipas ligjit zviceran.

Burim: Albinfo.ch
— Redaksia ZHURMA