Si e kaloi Joni sëmundjen e rëndë?

TIRANË — Joni, një djalë i vogël i sëmurë me kancer, ka marrë mesazhe mbështetëse nga futbollistët e Kombëtares shqiptare. Mesazhet e tyre kanë qenë një burim i madh forcë për Jonin, i cili tani, sipas të afërmëve, gëzon shëndet të plotë.

Kohë më parë, një mesazh i dhimbshëm mbërriti në FSHF, ku njoftohej se një tifoz i vogël, i cili vuante nga kanceri, do të gëzohej shumë nëse do kishte një mesazh mbështetës nga futbollistët e Kombëtares, të cilët ai i ndiqte me këshëri. Kërkesa nuk ra në vesh të shurdhër dhe shpejt Kristjan Asllani i nisi një video mesazh.

"Përshëndetje Joni, të uroj ta kalosh operacionin me sukses dhe të shërohesh sa më shpejt. Shpresoj të shihemi në qershor në Tiranë, një përqafim të fortë, ciao", ka thënë Kristjan Asllani në video-mesazhin e parë për Jonin.

Koha ka kaluar dhe pas një viti kanë ardhur lajme shumë të mira. I afërmi i Jonit të vogël ka njoftuar se djaloshi e ka kaluar sprovën. Ai ka shkruar: "Përshëndetje, para një viti ju kam shkruar për vëllain tim Jonin, i cili po luftonte me kancerin. Sot, me zemër plot gëzim, ju tregoj se pas një viti shumë të vështirë me kimioterapi dhe rrezatime, ai e ka fituar këtë betejë. Gjatë gjithë kohës, edhe nga spitali, ai nuk ka humbur asnjë ndeshje të Shqipërisë. Kombëtarja ka qenë forca dhe motivimi i tij më i madh."

Pas kësaj lumturie të madhe, futbollistët e Kombëtares kanë dërguar mesazhe video për Jonin. Elseid Hysaj ka thënë: "Përshëndetje Joni, jam shumë i lumtur për ty, për lajmin që mora, që ja dole. Fitove betejën e madhe, shpresoj që të të shoh shumë shpejt në stadium." Kristjan Asllani ka shtuar: "Joni, jam shumë i lumtur që e kalove këtë sfidë. Të uroj të gjitha të mirat në jetë dhe ishalla shihemi sa më shpejt në stadium." Juljan Shehu u shpreh: "Joni përshëndetje, jam shumë i lumtur për ty dhe krenar që ti ja dole me sfidën që pate. Shpresoj që t’ja kalosh sa më mirë tani dhe të presim në stadium." Arbër Hoxha tha: "Përshëndetje Joni, më vjen mirë që je mirë me shëndet. Faleminderit që na ndjek gjithmonë, shpresoj që të takohemi shumë shpejt." Mario Mitaj komentoi: "Përshëndetje Joni, jam shumë i lumtur që je mirë me shëndet. Bravo për forcën e treguar, të presim në stadium." Thomas Strakosha përfundoi: "Përshëndetje Joni, gëzohem që ja dole, bravo kampion. Ishalla takohemi sa më shpejt në stadium, të jemi bashkë, të përqafohemi bashkë dhe të na mësosh edhe neve si të jemi kaq të fortë."

Vetë Joni ka dalë para kamerës e falënderuar FSHF-në dhe lojtarët kuqezi për mbështetjen. "Faleminderit shumë, shumë jam gëzuar, ju dua krejt", thotë ai në mbylljen e videos.

Kjo histori tregon fisnikërinë e futbollistëve të Kombëtares shqiptare dhe të FSHF-së, që kanë plotësuar ëndrrën e një djaloshi të vogël të sëmurë, i cili tregoi burrëri përballë një vështirësie të madhe.

Burim: Shqiptarja, https://shqiptarja.com/lajm/mesazhet-nga-idhujt-e-tij-joni-i-vogel-mposht-semundjen-e-rende-futbollistet-e-kombetares-shqiptare-je-motivim-per-ne
— Redaksia ZHURMA