KPK miraton raportin për luftën ndaj korrupsionit të vitit 2025
Cilat prokurori patën suksesin më të lartë dhe cilat dështuan në trajtimin e krimeve ekonomike gjatë vitit të kaluar?
PRISHTINË — Këshilli Prokurorial i Kosovës (KPK) ka miratuar njëzëri Raportin vjetor të Komisionit Ad-Hoc Mbikëqyrës për zbatimin e Planit Strategjik për Luftimin e Korrupsionit dhe Krimeve Ekonomike për vitin 2025. Ky miratim u bë me shtatë vota për, pa asnjë votë kundër apo abstenim.
Raporti i prezantuar nga anëtarja e KPK-së, Elza Bajrami-Kastrati, pasqyron trajtimin e këtyre rasteve në të gjitha prokuroritë. Dokumenti përfshin analizën e 19 veprave të korrupsionit dhe 31 veprave të krimeve ekonomike, krahasimin ndër vite nga viti 2020 deri në vitin 2025, si dhe rekomandimet përkatëse.
Sipas të dhënave, shumica e kallëzimeve penale gjatë vitit 2025 u dorëzuan nga qytetarët, të pasuar nga policia dhe organet publike. Ndërkohë, prokuroria me vetiniciativë ka nisur vetëm katër raste. Viti nisi me 708 raste, u pranuan 677 të reja dhe u proceduan 529, ndërsa 1027 mbetën të patrajtuara.
Në aspektin e efikasitetit, Prokuroria Themelore e Gjilanit ka shënuar suksesin më të lartë, duke trajtuar 67% të kallëzimeve për korrupsion dhe krime ekonomike. Gjithashtu, kjo prokurori ka përfunduar plotësisht të gjitha lëndët e kategorisë KPN për vitin 2025, duke u shfaqur si më efikasja në vend.
Në krahun tjetër, Prokuroria e Mitrovicës ka shënuar numrin më të ulët të zgjidhjes së rasteve. Prokuroria e Prizrenit ka prirë me ngritjen e aktakuzave, pasi të gjitha rastet e saj përfunduan me aktakuzë, ndërsa ajo e Pejës pati më së paku aktakuza sepse shumicën e rasteve i hodhi.
Të gjitha ankesat për dështim të prokurorëve në trajtimin e lëndëve brenda afatit ligjor 6-mujor u aprovuan nga Apeli. Ndonëse gjykatat zakonisht dhanë aktgjykime dënuese, në Prishtinë përqindja e vendimeve liruese mbetet e lartë, e përafërt me ato dënuese, sipas të dhënave të prezantuara.
Ky bilanc vjen në një kohë kur alarmohet se në vend korrupsioni mbetet problem sistemik. Shifrat tregojnë mbingarkesë të madhe të lëndëve të pazgjidhura, çka dëshmon se zbatimi i rekomandimeve të miratuara nga këshilli është jetik për të garantuar llogaridhënie e efikasitet në ndjekjen penale.
Burim: Ekonomia Online
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.