Ku do të luajë Shakhtar Donetsk ndeshjet e Champions League sezonin e ardhshëm?

LONDËR — Shakhtar Donetsk, kampionët e Ukrainës, janë në bisedime për të gjetur një stadium në Angli ku do të zhvillojnë ndeshjet si vendas në Ligën e Kampionëve sezonin e ardhshëm.

Klubi nuk ka mundur të presë ndeshje ndërkombëtare në Ukrainë që nga pushtimi rus në vitin 2022, pasi UEFA ka ndaluar zhvillimin e ndeshjeve evropiane në vend për arsye sigurie. Që prej vitit 2014, Shakhtari ka qenë i detyruar të luajë larg stadiumit të tij, "Donbas Arena", pasi ky u godit nga bombardimet gjatë luftës në Donbas.

Sezonin e kaluar, Shakhtari luajti ndeshjet evropiane në Poloni, në stadiumin "Henryk Reyman" të Krakovit, me kapacitet 33.326 vende. Megjithatë, ky stadium nuk do të jetë më në dispozicion, pasi klubi vendas, Wisła Kraków, është rikthyer në elitën e futbollit polak. Kjo ka detyruar Shakhtarin të kërkojë alternativa të reja.

Opsioni kryesor raportohet të jetë stadiumi "Gtech Community Stadium" në Londër, shtëpia e Brentford, me kapacitet 17 mijë vende. Brentford ka lidhje të forta me komunitetin ukrainas në zonat fqinje të Hounslow dhe Ealing, ku jetojnë shumë banorë ukrainas. Klubi ka mbështetur gjithashtu familjet e zhvendosura përmes projekteve lokale.

Stadiumi ka përvojë në organizimin e ngjarjeve sportive të tjera, duke përfshirë ndeshje regbi dhe turne të futbollit. Një zëdhënës i Shakhtarit deklaroi se klubi është në negociata me disa stadiume në Mbretërinë e Bashkuar dhe Gjermani, por nuk ka dhënë detaje të mëtejshme derisa të merret një vendim përfundimtar.

Shakhtari do të nisë aventurën evropiane direkt nga faza e ligës së Champions League, e cila fillon më 8 shtator. Ndeshjet do të zhvillohen në tre ditë radhazi.

Burim: IndeksOnline
— Redaksia ZHURMA