Sa banorë rrezikon të humbasë Maqedonia brenda 25 vjetësh?

SHKUP — Kryeministri i Maqedonisë së Veriut, Hristijan Mickoski, paralajmëroi se vendi mund të humbasë nga 150 deri në 250 mijë banorë aktivë në tregun e punës brenda 25 vjetësh, në podkastin "Kade se parite" me Goran Temenugov.

Migrimi i të rinjve drejt Evropës Perëndimore, tha Mickoski, po krijon boshllëqe të mëdha në tregun e punës vendas — boshllëqe që mund t'i mbushin punëtorë nga vende të treta. "Nëse Evropa ka problem me demografinë, dhe ka madje më të madh se ne, atëherë një pjesë e potencialit tonë njerëzor largohet atje dhe krijon hapësirë bosh këtu", deklaroi ai.

Kryeministri theksoi se çështja e demografisë shpesh keqkuptohet ose ironizohet, por e konsideron ndër temat më të rëndësishme për të ardhmen e shtetit. Zhvillimi ekonomik, tha ai, do të varet nga aftësia për të mbajtur të rinjtë brenda vendit dhe për të krijuar kushte punësimi.

"Kur drejton një shtet, duhet të mendosh çfarë do të ndodhë pas 50, 75 apo 100 vitesh. Nëse nuk mendon në afat të gjatë, atëherë nuk duhet të merresh me këtë punë", u shpreh Mickoski. Analizat strategjike dhe politikat afatgjata janë thelbësore për të shmangur pasojat e krizës demografike.

Burim: Gazeta Express
— Redaksia ZHURMA