Si u kap mjeku i 'Nënë Terezës' me 199 ampula botoksi të kontrabandë?

SHKUP — Administrata Doganore ka ngritur kallëzim penal ndaj një mjeku dhe një infermiereje të dyshuar se tentuan të kontrabandojnë 199 ampula botoksi me vlerë rreth 10 mijë euro, përmes një dërgese postare të deklaruar rremë si mostra kozmetike me vlerë prej vetëm 80 dollarësh.

Rasti u zbulua nga zyrtarët doganorë në Pikën Doganore Shkup 1 gjatë kontrollit të një dërgese postare të paraqitur për zhdoganim. Dokumentacioni i shoqërues deklaronte se pakoja përmbante vetëm 10 mostra kozmetike, por pas kontrollit fizik u gjetën 199 ampula botoksi — produkte të destinuara për mjekësinë estetike.

Hetimet paraprake zbuluan se i dyshuari kryesor, mjek në Qendrën Klinike Universitare "Nënë Tereza", kishte porositur produktet nga një kompani në Korenë e Jugut dhe kishte rënë dakord që ato të paraqiteshin në faturë si produkte kozmetike me vlerë shumë më të ulët nga ajo reale.

Infermierja e dyshuar kishte pranuar që porosia të mbërrinte në emrin dhe adresën e saj, ndërsa pagesa e faturës ishte kryer nga llogaria e saj bankare. Ndaj të dyshuarve është paraqitur kallëzim penal në Prokurorinë Themelore Publike të Shkupit për veprat penale të kontrabandës dhe mashtrimit doganor.

Administrata Doganore theksoi se importi i botoksit është i rregulluar me procedura dhe leje të veçanta dhe çdo tentativë për shmangie të ligjit do të sanksionohet. Autoritetet ritheksuan politikën e tolerancës zero ndaj të gjitha formave të kontrabandës dhe mashtrimit doganor, duke vënë në dukje se kontrollet do të vazhdojnë.

Burim: TV21
— Redaksia ZHURMA