Çfarë masash kërkon prokuroria për dy rastet e dhunës në Shkup?
Prokuroria e Shkupit ka kërkuar masa sigurie ndaj dy personave të dyshuar për dhunë të rëndë fizike dhe psikologjike ndaj familjarëve të tyre.
SHKUP — Prokuroria Publike e Shkupit ka nisur procedurë kundër një 56-vjeçari për rrezikim të sigurisë. I dyshuari ka ushtruar për një kohë të gjatë dhunë psikologjike dhe fizike ndaj bashkëshortes dhe dy fëmijëve të tyre të moshës 18 dhe 15 vjeç.
Për shkak të frikës, familjarët nuk e kishin denoncuar asnjëherë sjelljen e tij agresive. Kjo situatë e rëndë kulmoi kur vajza 15-vjeçare, e paaftë për të përballuar më tej kërcënimet dhe presionin e vazhdueshëm të të atit, u përpoq t’i japë fund jetës së saj.
Hetim është hapur edhe ndaj një 33-vjeçari nga Shkupi që ushtroi dhunë fizike ndaj bashkëshortes së tij më 20 qershor. Ai e tërhoqi me forcë në makinë dhe tentoi ta godiste me shishe qelqi, ndërsa gruaja u hodh jashtë duke pësuar lëndime.
Prokuroria i ka propozuar gjykatës masa sigurimi për të dy të dyshuarit. Këto masa përfshijnë ndalimin e largimit nga vendbanimi, paraqitjen e rregullt në gjykatë, konfiskimin e përkohshëm të dokumenteve të udhëtimit, si dhe ndalimin e plotë të kontaktit apo afrimit me të dëmtuarit.
Burim: Telegrafi
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.