Importet arrijnë 2.9 miliardë euro në pesë muajt e parë të 2026

PRISHTINË — Dogana e Kosovës ka publikuar të dhënat për pesë muajt e parë të vitit 2026, të cilat tregojnë se vendi vazhdon të importojë shumë më tepër produkte sesa të shesë në tregjet e huaja. Gjatë kësaj periudhe pesëmujore, Kosova ka importuar mallra në vlerë prej 2.9 miliardë eurosh, duke shënuar një rritje të ndjeshme.

Në anën tjetër, eksportet e Kosovës gjatë kësaj periudhe arritën në vetëm 419.2 milionë euro. Kjo shifër do të thotë se deficiti tregtar ka shkuar në 2.5 miliardë euro, duke e bërë vlerën e mallrave që hyjnë nga jashtë rreth shtatë herë më të lartë se ato që shiten jashtë vendit.

Krahasuar me të njëjtën periudhë të vitit 2025, kur importet ishin 2.75 miliardë euro dhe eksportet ishin 356.8 milionë euro, importet janë rritur për 150 milionë euro. Ndërkaq, në raport me pesëmujorin e vitit 2024, Kosova ka importuar mbi gjysmë miliard euro më shumë mallra.

Ekonomisti Ismet Mulaj vlerëson se kjo rritje vjen nga mungesa e reformave strukturore, rritja e konsumit nga paratë e shpërndara prej Qeverisë për pensionet dhe pagat gjatë dy zgjedhjeve të fundit, si dhe remitencat. Kjo ka shtyrë konsumin dhe ka ndikuar që të rritet edhe inflacioni në Kosovë.

Ekonomisti Lulzim Beqiri e konsideron këtë vit si periudhë shqetësuese sa i përket varësisë tregtare, duke e quajtur atë çështje të sigurisë kombëtare. Ai thotë se institucionet do të duhej të investonin në prodhim dhe jo vetëm në aspektin deklarativ të deklaratave të fundit të kryeministrit Kurti.

Sipas Beqirit, përveç kompanive të pakta si Frutex, vendi nuk po gjen rrugë për eksportim, ndërsa diplomacia ekonomike në pesë vitet e fundit ka qenë inekzistente. Ai thekson se eksportet e mbulojnë vetëm 15% deri në 20% të importit total, çka tregon një situatë tejet shqetësuese.

Në anën tjetër, ministrja në detyrë Kusari Lila ka pranuar rritjen e deficitit tregtar, duke shtuar se po analizohet mundësia e zëvendësimit të produkteve të huaja përmes kontratave në prokurimin publik. Qeveria synon që me prokurim publik të mos u japë përparësi mallrave të importit përballë atyre vendore.

Burim: RTV21
— Redaksia ZHURMA