Pse po kërkohet trangulli i Rahovecit gjithnjë e më shumë në Evropë?

RAHOVEC — Serrat e Rahovecit po shndërrohen në pikënisjen e një suksesi të ri bujqësor për tregjet ndërkombëtare, ku trangulli i Kosovës po fiton besimin e konsumatorëve evropianë. Me çmime më të larta, rendiment të mirë dhe kërkesë në rritje, kjo kulturë po dëshmon se është ndër më fitimprurëset për fermerët tanë.

Fermeri Aziz Krasniqi nga fshati Radostë i Rahovecit kultivon tetë hektarë tokë me perime dhe kultura kungullore, prej të cilave 80 ari janë serra. Këtë vit, gjysmën e serrave ai e ka mbjellë me tranguj, duke pritur një prodhim mjaft cilësor dhe rendiment të lartë në vjelje.

Për të shmangur dëmtuesit që e kishin shqetësuar në vitet e kaluara, Krasniqi ka përdorur fidanë të shartuar, duke shmangur sëmundjet serioze. Ai tregon se shitja e produktit është e garantuar dhe shprehet i kënaqur me çmimin e sivjetmë që është dukshëm më i favorshëm se vitin e kaluar.

Agronomi Besim Sahiti thekson se trangulli renditet ndër tri kulturat perimore më të rëndësishme ekonomike në Kosovë, por suksesi varet nga sigurimi i tregut. Për shkak të ciklit të shkurtër të kultivimit, kjo kulturë kërkon kujdes të veçantë në ushqimin e bimës dhe në zbatimin e masave mbrojtëse.

Sipas Sahitit, sëmundjet kryesore janë vrugu dhe hiri i kungulloreve, ndërsa nga dëmtuesit veçohen tripsi, morri i gjetheve, merimanga dhe nematodi. Ky i fundit ka filluar të shfaqet së fundmi në Kosovë, duke kërkuar një menaxhim më profesional të parcelave për të shmangur dëmet e mundshme.

Edhe fermeri Emrush Taqi nga fshati Qifllak i Rahovecit konfirmon se cilësia dhe çmimet janë më të mira se vitin e kaluar. Megjithatë, ai vë në dukje se përkundër përfitimeve të larta, sfida më e madhe për kultivuesit në këtë zonë mbetet mungesa e theksuar e fuqisë punëtore.

Në pikën grumbulluese në Xërxë, të udhëhequr nga Feim Rexhepi, këtë vit pritet të grumbullohen rachet 1,500 tonë trangull, që paraqet dyfishim të vëllimit krahasuar me vitin e kaluar. Produkti i seleksionuar sipas standardeve eksportohet kryesisht në Evropë, ku kërkesa po rritet vazhdimisht falë cilësisë së lartë.

Burim: Zëri
— Redaksia ZHURMA