Pse operatorët gjermanë reduktuan me 40% rezervimet në Durrës?

DURRËS — Operatorët turistikë në qytetin e Durrësit kanë shprehur shqetësime të mëdha lidhur me rezervimet për sezonin turistik. Në një video të publikuar nga ministri i Turizmit, Kulturës dhe Sportit, Blendi Gonxhja, ata theksojnë se situata e krijuar në vend po ndikon negativisht te turistët e huaj dhe partnerët ndërkombëtarë.

Ministri Gonxhja bëri të ditur se operatorë të rëndësishëm ndërkombëtarë si "Dertour" dhe "Schauinsland" raportojnë një ulje prej rreth 40% të rezervimeve për këtë sezon. Sipas tij, kjo rënie nuk përbën thjesht shqetësim të biznesit privat, por është një sinjal që meriton vëmendjen e menjëhershme të të gjithë sektorit.

Nga ana tjetër, operatori turistik Fatos Cerenishti deklaroi se dy kompani të mëdha gjermane kanë pezulluar bashkëpunimin, duke sjellë uljen e rezervimeve. Cerenishti i bëri thirrje ministrisë që të dialogojë me partnerët dhe t'i informojë ata se në Shqipëri gjithçka është normale dhe se protestat nuk do të ndikojnë në mbarëvajtjen e sezonit.

Gonxhja shtoi se pas çdo përqindjeje qëndrojnë investime, vende pune, biznese familjare dhe mijëra njerëz që sigurojnë të ardhurat nga turizmi. Sipas ministrit, çdo veprim që dëmton imazhin e vendit sjell pasoja reale për ekonominë, punësimin dhe mirëqenien e shumë familjeve shqiptare që varen direkt nga ky sektor.

Burim: ATSH
— Redaksia ZHURMA