Çfarë shkeljesh gjeti ZKA në projektet milionëshe të rrugëve?

PRISHTINË — Auditimi i fundit i Zyrës Kombëtare të Auditimit për Ministrinë e Mjedisit, Planifikimit Hapësinor dhe Infrastrukturës ka zbardhur dështime të rënda në menaxhimin e investimeve kapitale. Raporti i auditorit zbulon shkelje të shumta të procedurave të prokurimit publik, mangësi të theksuara në vlerësimin e ofertave dhe dobësi të mëdha gjatë mbikëqyrjes së kontratave milionëshe.

Në kontratën për mirëmbajtjen e rrugëve nacionale, me vlerë 15.3 milionë euro, fituesi u përzgjodh ndonëse nuk kishte ofruar dëshmi për pajisjet e kërkuara. Po ashtu, në rehabilitimin e rrugës Shtime–Carralevë prej 12 milionë eurosh, u evidentuan mangësi serioze në verifikimin e dokumentacionit dhe të kapaciteteve teknike të operatorëve ekonomikë.

Auditori ka konstatuar probleme të mëdha edhe me kontratat me çmime për njësi, ku u gjetën tejkalime sasish prej 1.28 milion euro dhe punime të pakryera në vlerë prej 688 mijë eurosh. Krahas kësaj, pagesa të shumta u realizuan pa dokumente, ndërsa vonesat ndaj bizneseve kapën shifrën mbi 2 milionë euro.

Raporti specifikon katër projekte të bllokuara rrugore. Ndër to është sanimi i rrëshqitjeve në rrugën Pejë–Kuqishtë, i nënshkruar në shkurt 2025 për 1.57 milionë euro, që mbeti i papërfunduar. Njësoj ka ndodhur edhe me zgjerimin e rrugës Prishtinë–Podujevë, me vlerë 9.25 milionë euro, ku punimet nuk përfunduan as pas dy aneks-kontratave shtesë.

Skenar i ngjashëm u regjistrua në rrugën Prizren–Kufiri me Maqedoninë e Veriut, me vlerë 7.99 milionë euro, ku afatet u shkelën pavarësisht kontratës shtesë prej 653 mijë eurosh. Gjithashtu, loti i tetë i autoudhës Banullë–Dheu i Bardhë, me vlerë 11.9 milionë euro, zvarritet që nga viti 2018 pa u finalizuar.

Sipas auditorit, vonesat vijnë nga planifikimi i dobët, problemet me shpronësimin dhe rrëshqitjet e dheut. Këto shkelje ngrenë dyshime të mëdha mbi mënyrën se si u pranuan ofertat prej 1 euro në tenderin 3-milionësh apo projekte të tjera ku ligji u shmang haptazi gjatë vlerësimit të kritereve kryesore.

Burim: IndeksOnline
— Redaksia ZHURMA