Si po ndryshon Shtëpia e Futbollit para Europianit U-21?
Federata Shqiptare e Futbollit ka nisur rehabilitimin e dy fushave me bar natyral në Tiranë, si pjesë e përgatitjeve për Kampionatin Europian U-21.
TIRANË — Federata Shqiptare e Futbollit ka nisur punimet për rehabilitimin e plotë të dy fushave me bar natyral në kompleksin “Shtëpia e Futbollit”. Ky investim vjen si pjesë e përgatitjeve që po bëhen për organizimin e ndeshjeve finale të Kampionatit Europian U-21, i cili do të zhvillohet vitin e ardhshëm në Shqipëri.
Në kuadër të këtij projekti, tashmë është bërë heqja e tapetit ekzistues dhe në ditët në vijim pritet të fillojë mbjellja e barit të ri. Sipas njoftimit zyrtar, punimet po ecin sipas afateve të parashikuara dhe fushat do të jenë plotësisht të gatshme për përdorim në mesin e muajit shtator.
FSHF synon që përmes këtij rehabilitimi të rrisë cilësinë e terreneve stërvitore, duke krijuar kushte sa më optimale për aktivitetet e futbollit dhe për Kombëtaren shqiptare. Përmirësimi i infrastrukturës sportive mbetet jetik për ecurinë e ekipeve tona në arenën ndërkombëtare.
Burim: ATSH
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.