Si do të ndryshojë moti në Kosovë këtë javë, me vapë deri në 38°C?

PRISHTINË — Pas disa ditësh me vapë intensive, Kosova përballet me një ndryshim të ndjeshëm të motit këtë javë. Fillimi i saj do të karakterizohet nga temperatura ekstreme, me vlera deri në 38 gradë Celsius, ndërsa nga mesi pritet depërtimi i një mase ajrore më të freskët.

Sipas parashikimit të Institutit Hidrometeorologjik të Kosovës (IHMK), java do të nisë me nxehtësi të theksuar. Dita më e nxehtë pritet të jetë e hëna, me temperatura maksimale nga 32 deri në 38 gradë Celsius. Të martën, moti do të mbetet i nxehtë, me vlera deri në 35 gradë, por me rritje të vranësirave dhe reshjeve lokale.

Ndryshimi më i madh pritet të ndodhë të mërkurën, kur moti do të bëhet më i paqëndrueshëm. Parashihen reshje lokale shiu, shkarkime rrufesh, dhe në zona të izoluara mundësi për breshër dhe erëra të forta. Temperaturat do të bien ndjeshëm të enjten dhe të premten, duke arritur 24–28 gradë Celsius.

IHMK-ja u bën thirrje qytetarëve të jenë të kujdesshëm gjatë ditëve me nxehtësi ekstreme. Personat me sëmundje kronike, të moshuarit dhe fëmijët këshillohen të shmangin ekspozimin në diell midis orëve 10:00–17:00, të konsumojnë lëngje dhe të kufizojnë aktivitetet fizike në ambiente të hapura.

Me ardhjen e ajrit më të freskët nga mesi i javës, kushtet biometeorologjike pritet të përmirësohen. Instituti ka dhënë rekomandime edhe për sektorin bujqësor, duke paralajmëruar për rritjen e humbjes së lagështisë nga toka në fillim të javës, por edhe për mundësinë e përmirësimit të rezervave të ujit pas reshjeve.

Ndërkohë, pjesë të mëdha të Evropës Perëndimore vazhdojnë të përballen me valë të nxehtit, me temperatura mbi 40 gradë Celsius në Spanjë, Portugali, Francë dhe Itali. Në Kosovë, megjithatë, freskimi pritet të sjellë kushte më të favorshme atmosferike deri në fundjavë.

Burim: Klan Kosova
— Redaksia ZHURMA