Si u zbulua vjedhja e vodkës në Albi Mall?

PRISHTINË — Dy persona u ndaluan për 48 orë nën dyshimin për vjedhje në një market të Albi Mall, pasi u kapën nga kamerat e sigurisë dhe u detyruan të paguajnë vlerën e mallrave të vjedhura.

Rasti u raportua më 26 qershor, rreth orës 19:30, në rrugën "Kadri Zeka". Ankuesi deklaroi se përmes kamerave u vërejtën tre persona — një grua dhe dy burra — të cilët dyshohen se vodhën pije alkoolike dhe u larguan nga marketi. Fillimisht u raportua vjedhja e tri shishave me vlerë 113 euro, por më pas u konstatua se ishin katër shishe me vlerë 140 euro.

Më 27 qershor, rreth orës 20:30, sigurimi i Albi Mall njoftoi Policinë se kishte ndaluar dy nga të dyshuarit. Pas verifikimit të kamerave dhe deklaratës së ankuesit, dyshohet se ata, së bashku me një person të tretë, kryen vjedhjen. Të dyshuarit kompensuan vlerën e gjësendeve pasi u ndaluan nga sigurimi.

Dy të dyshuarit, Sh.S. dhe L.M., u intervistuan në prani të avokatit mbrojtës, ndërsa personi i tretë mbetet i paidentifikuar. Me vendim të Prokurorit kujdestar, ata u ndaluan për 48 orë dhe u dërguan në Qendrën e Mbajtjes në Lipjan. Rasti është klasifikuar si "Vjedhje në bashkëkryerje".

Burim: Sinjali
— Redaksia ZHURMA