Si u zbulua vrasja e Eglant Koçit pas zhdukjes së trupit?

TIRANË — Plani i 41-vjeçarit Armand Shakaj për të fshehur vrasjen e mikut të tij, Eglant Koçi, dështoi pas një hetimi të policisë. Më 4 qershor, Shakaj e ekzekutoi Koçin me plumb në kokë pranë shkollës “Ismail Qemali” në Tiranë, duke nisur menjëherë punën për fshehjen e trupit.

Të nesërmen, më 5 qershor, ai e vendosi trupin në makinën e tij tip Porsche. Për të fshehur gjurmët, Shakaj e transportoi automjetin me karrotrec deri në fshatin Ibë, duke e gënjyer drejtuesin e karrotrecit se po e dërgonte Porsche-n për riparim në një servis.

Nga Iba, ai udhëtoi drejt Cërrujës, duke ndjekur një itinerar përmes Mollagjeshit dhe Funarit. Këtë zonë të thepisur malore autori e njihte mirë pasi kryente rregullisht gara reli me motorë, çka i dha mundësi të lëvizte nëpër shtigje të pyllëzuara që njiheshin vetëm nga banorët.

Pasi eci për tri orë e gjysmë në terrenin e vështirë, ai arriti në pikën më të lartë, në Majën e Korrës. Aty Shakaj e nxori kufomën e Eglantit nga makina dhe e hodhi në një humnerë të pyllëzuar, i bindur se nuk do të gjendej kurrë.

Por Shakajn e tradhtoi telefoni i tij celular. Policia arriti të zbulojë se ku kishte pulsuar për herë të fundit aparati përmes pajisjes IMSI Catcher. Hetuesit siguruan gjithashtu informacione operative se makina Porsche ishte parë nga barinjtë e zonës duke kaluar nëpër ato fshatra.

Kërkimet e policisë zgjatën dhjetë ditë nga toka dhe ajri, derisa një dron pikasi trupin në Majën e Korrës. Gjatë kësaj kohe, Shakaj ishte larguar nga një tjetër itinerar malor drejt Tiranës, ku u mor në pyetje nga Komisariati Numër 2 dhe dha dëshmi të rreme.

Pas marrjes në pyetje, 41-vjeçari guxoi të takonte familjarët e viktimës, duke u hequr si i shqetësuar për mikun e tij. Vetëm dy ditë më vonë, hetimet intensive zbuluan skenarin e vrasjes, duke vërtetuar se as terrenet e thepisura dhe as gënjeshtrat nuk mjaftuan për të fshehur krimin.

Burim: Telegrafi
— Redaksia ZHURMA