Strasburgu: Shteti i paguan 3.600 euro Janakieskit dhe Mitrovskit

STRASBURG — Gjykata Evropiane e të Drejtave të Njeriut vendosi sot se shfuqizimi i faljeve presidenciale të ish-presidentit Gjorge Ivanov në 2016 ka qenë i justifikuar, pasi faljet ishin pa bazë ligjore në një krizë politike, por shteti duhet t'u paguajë nga 3.600 euro ish-funksionarëve Mile Janakieski dhe Kosta Mitrovski për shkelje të së drejtës për gjykim të drejtë.

Vendimi vjen në rastin "Taleski dhe të tjerët kundër Maqedonisë së Veriut", i cili u ngrit nga ish-kryetari i Komunës së Manastirit, i cili u dënua dhe e vuajti dënimin me burg për rastin "Transportuesi", të cilin e hapi ish-Prokuroria Speciale Publike, transmeton Portalb.mk nga Slloboden Peçat.

Gjykata gjeti njëzëri se nuk ka pasur shkelje të nenit 6 paragrafi 1 të Konventës Evropiane për shkak të ndërhyrjes ligjore që lejoi shfuqizimin e faljeve dhe vazhdimin e procedurave penale. Sipas vendimit, "interesi publik, domethënë përgjegjësia e funksionarëve dhe sundimi i ligjit ka qenë më i rëndësishëm se parimi i sigurisë juridike".

Megjithatë, për Janakieskin dhe Mitrovskin (ish-kryetar i komisionit zgjedhor komunal në Qendër) u konstatua shkelje: Gjykata Supreme dështoi ta kthente lëndën në Apel për korrigjim, duke lënë pa rishqyrtim çështje të ngritura më herët. Sipas vendimit, "edhe pse parashtruesit e kërkesës më vonë paraqitën kërkesa për rishqyrtim të jashtëzakonshëm në Gjykatën Supreme, ai shqyrtim ishte i kufizuar për nga vëllimi dhe nuk i përfshinte të gjitha çështjet e ngritura në parashtresat e prokurorit para Gjykatës së Apelit, me çka disa çështje u zgjodhën përfundimisht në procedurën e apelit dhe nuk mund të rishikoheshin sërish nga Gjykata Supreme. Mënyra e vetme e mundshme për eliminimin e mangësive në procedurën e apelit në një krizë të tillë do të ishte që Gjykata Supreme ta shfuqizonte aktgjykimin e apelit dhe ta kthente lëndën në Gjykatën e Apelit. Duke mos e bërë këtë Gjykata Supreme dështoi në korrigjimin e shkeljes të së drejtës së aplikuesve për një procedurë kontradiktore. Prandaj, ka pasur shkelje të nenit 6 paragrafi 1 në lidhje me të drejtën e z. Janakieski dhe z. Mitrovski për një gjykim të drejtë".

Rasti buron nga faljet masive të 2016-s për funksionarë të lidhur me aferën e përgjimeve, të shfuqizuara më vonë me ligj. Në 2023, Gjykata e Strasburgut i kishte gjetur të papranueshme aplikimet e të dënuarve të tjerë nga këto lëndë.

Përveç kësaj, sipas një vendimi të mëparshëm të Gjykatës Evropiane për të Drejtat e Njeriut, Mile Janakieski është mbajtur në paraburgim pa arsye në dy raste.

Ky vendim tregon se edhe ndërhyrja ligjore e mirëfilltë mund të lëshojë vrima procedurale që kushtojnë buxhetit shtetëror.

Burim: Portalb
— Redaksia ZHURMA