Pse po rritet numri i zjarreve nga energjia elektrike në Kosovë?

— Zjarret në ndërtesat kolektive, shtëpi dhe objekte biznesi po bëhen gjithnjë e më të shpeshta në Kosovë. Sipas të dhënave të prezantuara në emisionin "Zjarret nga rryma" në "KallxoPërnime", pjesa më e madhe e këtyre rasteve lidhet me instalimet elektrike të pasigurta, mbingarkesën e rrjetit dhe kyçjet ilegale të energjisë.

Lulzim Fushtica, Drejtori për Siguri dhe Emergjenca në Komunën e Prishtinës, deklaron se gjatë viteve të fundit është shënuar një rritje e zjarreve në ndërtesat kolektive. Fushtica thekson se hetimet tregojnë se shumica e rasteve janë pasojë e pakujdesisë dhe ndërhyrjeve në rrjetin elektrik, përfshirë përdorimin e pajisjeve me konsum të lartë të energjisë.

Komandanti i Brigadës së Zjarrfikësve në Drenas, Afrim Gjeli, vëndos theksin te punimet joprofesionale. Sipas Gjelit, ndërhyrjet nga persona të paautorizuar dhe pajisjet e vjetruara elektrike mbeten ndër shkaqet kryesore të shpërthimit të zjarreve, gjë që mund të shkaktojë pasoja serioze në objekte banimi apo biznesi.

Avni Alidemaj nga KEDS paralajmëron se kyçjet ilegale përbëjnë rrezik serioz, pasi personat që i realizojnë ato përdorin materiale të papërshtatshme. Kjo praktikë rrit rrezikun për dëmtim të rrjetit dhe shpërthim zjarri, andaj Alidemaj u bën thirrje qytetarëve që për çdo kyçje të re të ndjekin procedurat zyrtare dhe të kërkojnë asistencën e ekipeve të autorizuara.

Një tjetër problematikë është banimi në ndërtesa që nuk kanë kaluar pranimin teknik. Vehbi Krasniqi, komandanti i Zjarrfikësve në Suharekë, thotë se shumë objekte popullohen para certifikimit të sistemeve elektrike dhe atyre kundër zjarrit, gjë që shkakton djegie të orëve elektrike dhe dëme materiale të konsiderueshme.

Zjarre-fikësi Malë Gashi nga Brigada e Prishtinës vë në dukje se në ndërtesat shumëkatëshe rreziku më i madh mbetet tymi i dendur që përhapet shpejt. Edhe pse evakuimi nga katet e larta është sfidë e madhe, Gashi konfirmon se fatmirësisht nuk kanë pasur humbje jete në këto raste, ndonëse tymi mbetet rreziku kryesor.

Për sa i përket zjarreve fushore, Fushtica raporton se në Prishtinë janë realizuar mbi 5 mijë intervenime gjatë vitit të kaluar, ku 99 për qind të tyre shkaktohen nga faktori njeri. Ndërkohë, zjarrfikësit në Suharekë po përballen me mungesë personeli pasi kërkesat për punëtorë sezonalë nuk janë realizuar, duke vështirësuar reagimin gjatë sezonit veror.

Burim: Gazeta Express
— Redaksia ZHURMA