ZKA gjen shkelje në miliona euro prokurime të Ministrisë së Mbrojtjes

PRISHTINË — Zyra Kombëtare e Auditimit (ZKA) ka publikuar raportin vjetor të auditimit për Ministrinë e Mbrojtjes për vitin 2025, ku evidentohen mangësi të rëndësishme, sidomos në fushën e prokurimit publik. Edhe pse pasqyrat financiare të ministrisë kanë marrë opinion të pamodifikuar, ZKA ka dhënë opinion të kualifikuar për pajtueshmërinë me ligjet për shkak të shkeljeve të identifikuara.

Gjetja kryesore lidhet me procedurat e prokurimit publik dhe është cilësuar si çështje që ka ndikuar drejtpërdrejt në konkluzionin e përgjithshëm të auditimit. Auditorët kanë konstatuar se në nëntë kontrata, menaxherët e kontratave nuk kanë përditësuar në mënyrë të rregullt dhe në kohë reale të dhënat në sistemin elektronik të prokurimit.

Pagesat dhe informacione të tjera të rëndësishme nuk janë regjistruar siç kërkohet në modulin e menaxhimit të kontratave në E-prokurim, gjë që bie ndesh me rregulloren e KRPP-së. Në gjashtë procedura prokurimi me vlerë mbi 500 mijë euro, Ministria e Mbrojtjes nuk ka përgatitur dhe publikuar njoftimin paraprak, siç kërkohet me Ligjin për Prokurim Publik.

ZKA thekson se këto probleme vijnë kryesisht si pasojë e mungesës së kontrollit të brendshëm dhe mbikëqyrjes së dobët, si dhe ndryshimeve të shpeshta të menaxherëve të kontratave. Këto mangësi kanë ulur nivelin e transparencës në prokurimet e mëdha dhe kanë rritur rrezikun për vonesa, shkelje procedurale dhe mungesë të konkurrencës së drejtë.

Ministria e Mbrojtjes nuk pajtohet me këto gjetje. Në përgjigjen zyrtare ka argumentuar se prokurimet në fushën e mbrojtjes kanë specifika të veçanta dhe rregullohen me rregullore të veçanta për prokurime për qëllime të mbrojtjes. Ajo thekson se planet e prokurimit publikohen në E-prokurim dhe në faqen zyrtare të institucionit, ndërsa vonesat në përditësim lidhen kryesisht me ndryshimet e shpeshta të stafit.

Megjithatë, ZKA ka mbajtur të pandryshuara gjetjet dhe rekomandimet e saj, duke theksuar se arsyetimet e Ministrisë nuk e eliminojnë shkeljen e konstatuar në zbatimin e ligjit. Përveç çështjeve në prokurim, raporti përfshin edhe disa gjetje të tjera: Ministria ka shpenzuar 201.8 milionë euro, ose 96 për qind të buxhetit final; janë evidentuar rreth 2.87 milionë euro pagesa të papaguara për kujdestari të pjesëtarëve të FSK-së; nënvlerësim në menaxhimin e barnave dhe pasurive në vlerë prej 116,758 euro; si dhe vonesa në inventarizim dhe në përmbushjen e kontratave.

Në total, raporti përmban gjashtë rekomandime, disa prej të cilave janë përsëritur edhe nga vitet e kaluara. ZKA thekson nevojën për forcim urgjent të kontrollit të brendshëm dhe respektim më rigoroz të procedurave ligjore në prokurimin publik — një kërkesë që ministria e ka refuzuar të pranojë, duke lënë pyetjen se kush do ta mbajë përgjegjësinë për milionat që qarkullojnë pa transparencë.

Burim: Lajmi.net, https://lajmi.net/zka-deshtime-serioze-ne-prokurimin-e-ministrise-se-mbrojtjes-mungese-kontrolli-dhe-shkelje-ligjore-ne-miliona-euro-kontrata/
— Redaksia ZHURMA