Pse Ali Ahmeti dhe Menduh Thaçi po kërkojnë zgjedhje të reja?

SHKUP — Kreu i Bashkimit Demokratik për Integrim (BDI), Ali Ahmeti, ka akuzuar ashpër VMRO-DPMNE-në dhe koalicionin VLEN se po përdorin sulmet ndaj arritjeve të shqiptarëve si strategji elektorale. Sipas tij, goditjet ndaj Ligjit të Gjuhëve dhe parimit të përfaqësimit të drejtë po bëhen me qëllim për të fituar pikë politike.

Ahmeti deklaroi se nuk i hidhërohet VMRO-së pasi ajo e ka në programin e vet anti-shqiptarizmin dhe qëndrimet kundër UÇK-së për të marrë pushtetin. Megjithatë, ai theksoi se rreziku kryesor vjen nga përfaqësuesit shqiptarë që po solidarizohen me këtë agjendë dëmtuese dhe po tolerojnë heqjen e këtyre të drejtave.

Lideri i BDI-së dërgoi një mesazh paralajmërues për eksponentët e rinj politikë, duke u bërë thirrje që të dëgjojnë dhe të mësojnë nga e kaluara. Ai shtoi se nuk duan destabilizim por paqe, duke përdorur shprehjen popullore se "gur pas guri bëhet kalaja, ama fjalë pas fjale, do një belaja".

Nga ana tjetër, kreu i PDSH-së Menduh Thaçi u rreshtua me qëndrimin për zgjedhje të shpejta, duke kritikuar politikat e kryeministrit Hristijan Mickoski. Thaçi deklaroi se qeveria e re po ndjek receta të vjetruara pseudo-nacionaliste të ngjashme me ato të presidentit serb Aleksandar Vuçiq për të rritur rejtingun e vet politik.

Në vlerësimin e tij, kreu i PDSH-së parashikon që zgjedhjet e parakohshme do të ndodhin pas gjashtë ose tetë muajsh. Thaçi theksoi se pas kësaj periudhe, kryeministri do të jetë i detyruar të bëjë të gjitha kompromiset e mundshme pasi mbajtja e pushtetit pa to nuk do të ketë kuptim.

Kjo thirrje për mobilizim vjen pasi Ahmeti propozoi mbajtjen e zgjedhjeve të parakohshme në pranverë, duke kërkuar organizim të plotë partiak. Megjithatë, kryeministri Mickoski ka hedhur poshtë këto kërkesa, duke këmbëngulur se zgjedhjet e ardhshme do të jenë të rregullta dhe do të mbahen në vitin 2028.

Burim: TV21
— Redaksia ZHURMA