Si do të balancohet meritokracia me përfaqësimin etnik në Maqedoni?

SHKUP — Deputeti i VLEN-it Adnan Azizi ka sqaruar se si do të funksionojë Ligji i ri për përfaqësim të drejtë dhe adekuat, i cili ende gjendet në procedurë kuvendore, duke theksuar se meritokracia nuk cenon përfaqësimin etnik kur kandidatët janë të barabartë.

Në një intervistë për Click Plus, Azizi citoi Komisionin e Venecias, duke thënë se është kërkuar që të mos cenohet parimi i meritokracisë, kompetencës, integritetit dhe profesionalizmit. Sipas tij, ligji në pamje të parë duket se vë theksin te meritokracia, por përfaqësimi etnik do të rregullohet me një metodologji që do të sillet gjashtë muaj pas miratimit.

Azizi shpjegoi se në këtë metodologji do të bëhet planifikimi i punësimit, shpërndarja e vendeve të punës dhe operacionalizmi i ligjit, duke identifikuar ku mungon përfaqësimi i shqiptarëve dhe si të arrihen avancimet në kohë optimale, në bazë të regjistrimit të popullsisë.

Për të ilustruar, ai dha një shembull praktik: nëse për një vend pune konkurrojnë një maqedonas dhe një shqiptar me merita të njëjta, për shkak të diskriminimit pozitiv do t'i jepet përparësi kandidatit shqiptar. Kjo ngriti pyetjen se si do të parandalohen keqpërdorimet me deklarime të rrejshme etnike, siç ka ndodhur më herët.

Sipas Azizit, dokumentet në gjuhën shqipe — letërnjoftimi, pasaporta, leja e vozitjes, nënshtetësia, certifikata e lindjes — do të merren si të vlefshme për të verifikuar përkatësinë etnike. Institucionet do të kenë për obligim të bëjnë kryqëzimin dhe verifikimin e personit që aplikon në emër të një etniteti. Në rast të vërtetimit të abuzimit, personit do t'i hiqet e drejta të aplikojë në atë konkurs.

Burim: TV21
— Redaksia ZHURMA