Çfarë trashëgimi lë pas vettingu pas nëntë vitesh?

TIRANË — Kryetarja e KLP-së, Mirela Bogdani, vlerësoi sot se përmbyllja e rivlerësimit kalimtar të gjyqtarëve dhe prokurorëve shënon kalimin nga një proces reformues drejt përgjegjësisë së përditshme institucionale. Në ceremoninë përmbyllëse të organizuar nga Kolegji i Posaçëm i Apelimit, ajo theksoi se pas nëntë vitesh është e mundur të vlerësohen jo vetëm rezultatet, por edhe ndikimi në institucionet e drejtësisë.

"Nëntë vite pas fillimit të tij, tashmë është e mundur të vlerësohen jo vetëm rezultatet, por edhe ndikimi që ky proces ka pasur mbi institucionet dhe vetë shoqërinë shqiptare", u shpreh Bogdani.

Sipas saj, vettingu ka qenë një nga ndërhyrjet më të thella në sistemin e drejtësisë, duke sjellë ndryshime në integritet dhe llogaridhënie, por edhe sfida të konsiderueshme. Ajo përmendi debate, pritshmëri të larta publike, vakanca në sistem dhe vështirësi që kanë ndikuar në funksionimin normal të institucioneve.

Sfida kryesore tani, sipas Bogdanit, nuk është më vlerësimi i asaj që është arritur, por garantimi që standardet e vendosura të bëhen pjesë e qëndrueshme e kulturës institucionale. "Përgjegjësia për ruajtjen dhe forcimin e këtyre standardeve kalon tashmë tek institucionet kushtetuese që qeverisin dhe mbikëqyrin sistemin", deklaroi ajo.

Bogdani nënvizoi se KLP-ja do të vijojë të fokusohet në garantimin e një sistemi prokurorie të bazuar në meritë, integritet profesional dhe pavarësi. Trashëgimia më e rëndësishme e vettingut, shtoi ajo, është vendosja e standardeve të reja që konsiderohen të panegociueshme — jo thjesht rivlerësimi i individëve, por një standard i ri për vetë sistemin.

Vettingu i drejtësisë shqiptare nisi në vitin 2017 dhe ka kaluar nëpër faza të ndryshme kontrolli të pasurisë, figurës dhe profesionalizmit të magjistratëve. Kalimi në fazën e përgjegjësisë institucionale e zhvendos presionin nga procesi i jashtëzakonshëm tek monitorimi i rregullt.

Burim: ATSH
— Redaksia ZHURMA