Çfarë kërkon Veliaj nga Gjykata e Lartë për masën e sigurisë?
Kryebashkiaku i Tiranës kërkon zbutjen e masës "arrest me burg" që mban prej 10 shkurtit 2025.
TIRANË — Gjykata e Lartë pritet të shqyrtojë këtë të enjte rekursin e kryebashkiakut të Tiranës, Erion Veliaj, i cili kërkon ndryshimin e masës së sigurisë "arrest me burg" me një masë më të butë.
Paralelisht, Gjykata Kushtetuese ka kthyer për rishqyrtim një tjetër kërkesë të Veliajt lidhur me lirinë e tij. Kushtetuesja kërkon argumentim të detajuar mbi proporcionalitetin e masës së sigurisë në raport me funksionin publik që ushtron Veliaj si kryebashkiak. Sipas saj, Gjykata e Lartë duhet të vlerësojë nëse masa "arrest me burg" cenon të drejtën për t'u zgjedhur dhe ushtrimin e mandatit.
Trupa gjykuese pritet të argumentojë edhe pse masat alternative nuk konsiderohen të mjaftueshme, në përputhje me vendimin unifikues të Gjykatës së Lartë të 4 majit që parashikon arsyetim të posaçëm kur vendoset masa më e rëndë e sigurisë.
Veliaj ndodhet në paraburgim që prej 10 shkurtit 2025. SPAK i ka ngritur 13 akuza, mes tyre korrupsion pasiv, pastrim parash, mosdeklarim pasurie, shpërdorim detyre dhe futje të sendeve të ndaluara në institucionet e vuajtjes së dënimit.
Burim: Telegrafi
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.