Pse u refuzuan 7.325 votues jashtë Kosovës?
Anëtari i KQZ-së Alban Krasniqi detajoi procedurën e ankesave për refuzimet në regjistrimin e votuesve nga diaspora.
PRISHTINË — Anëtari i Komisionit Qendror të Zgjedhjeve nga radhët e Lëvizjes Vetëvendosje, Alban Krasniqi, ka njoftuar se aplikuesve të refuzuar si votues jashtë Kosovës u takon e drejta e kundërshtimit administrativ brenda 24 orëve. Përmes një postimi në Facebook, ai ka bërë të ditur se ankesat duhet të dërgohen në adresën elektronike kundershtimi.vjk@kqz-ks.org.
Krasniqi specifikoi dokumentacionin e nevojshëm: fotografinë personale me dokument identifikues në dorë, dokumentin e munguar dhe një tekst kërkese për aprovimin e regjistrimit. Ai apeloi që qytetarët të ndjekin procedurat brenda afatit të përcaktuar.
Afati për regjistrim si votues jashtë Kosovës mbylli mbrëmë. Sipas të dhënave preliminare të KQZ-së, janë pranuar gjithsej 142.803 kërkesa përmes platformës elektronike. Deri tani, 109.696 aplikime janë aprovuar, 7.325 janë refuzuar, ndërsa 25.702 mbeten në shqyrtim.
Burim: Zëri
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.