Kur do të nisë ndërtimi i Çebrenit dhe Galishtës?

SHKUP — Aktivitetet në terren për projektin e shumëpritur të Çebrenit dhe Galishtës pritet të nisin në fund të mandatit të kësaj qeverie në vitin 2028. Sipas planeve, ky megaprojekt energjetik do të përfundojë plotësisht pas shtatë vitesh punime, përkatësisht në vitin 2035.

Detajet e këtij vizioni u zbuluan nga zëvendësministri i Energjetikës, Mirosllav Llabudoviq, gjatë një interviste për emisionin "Biznes 21". Ai theksoi se projekti do të jetë tërësisht shtetëror dhe do të shërbejë si një xhevahir i vërtetë për sektorin e energjetikës.

EMV tashmë ka filluar negociatat me bankat për të siguruar kredi dhe kushte të favorshme për pagesën e të gjithë projektit. Sipas vlerësimeve fillestare, ky megaprojekt pritet të kushtojë nga 1 deri në 1.5 miliardë euro për t'u ndërtuar plotësisht.

Megaprojekti parashikon ndërtimin e tri digave të mëdha ujore: Çebren, Galishtë dhe Orlov Kamen. Ky sistem do të funksionojë si një pikë pompim-ruajtëse, duke mundësuar që kapaciteti i ujit të shfrytëzohet maksimalisht për prodhimin e energjisë së pastër elektrike në vend.

Përveç projekteve hidroenergjetike, Llabudoviq foli edhe për planet e ndërtimit të data-qendrave të reja për të cilat ka pasur reagime publike. Ai konfirmoi se negociatat me investitorët e interesuar janë duke vazhduar dhe detajet do të prezantohen sapo të arrihet marrëveshja përfundimtare.

Për të mundësuar këto investime, qeveria ka iniciuar ndryshime ligjore për ndërtimin e këtyre qendrave, duke argumentuar se ekonomia nuk mund të bazohet vetëm te bujqësia. "S'mund ta mbajmë ekonominë me speca e domate", theksoi Llabudoviq, duke mbrojtur nevojën e ndryshimit të ligjeve.

Lidhur me çmimin e energjisë, zëvendësministri u shpreh optimist se nuk do të ketë shtrenjtim të rrymës vitin e ardhshëm, pasi çmimi vendor është nën 100 euro për megavat/orë. Me tregtimet e kryera nga EMV, ku çmimet në bursa bien deri në zero, mesatarja sillet rreth 70 euro.

Burim: TV21
— Redaksia ZHURMA