Si e zëvendëson Kurti shërbimin e detyrueshëm me mbrojtjen gjithëpërfshirëse?

PRISHTINË — Kryeministri në detyrë Albin Kurti ka deklaruar se shërbimi i detyrueshëm ushtarak mbetet vetëm një opsion për të ardhmen, ndërsa aktualisht institucionet kanë vlerësuar se modeli i mbrojtjes gjithëpërfshirëse është më funksional për vendin.

Në një konferencë për media, Kurti tha se ky model i ngjan atij të Finlandës dhe vendeve baltike, ku qytetarët përgatiten për role konkrete në raste emergjencash, fatkeqësitë natyrore apo lufte të armatosur, pa krijuar një forcë të madhe ushtarake. "Kjo është një temë e gjatë, por mos harroni çfarë kemi bërë dhe kjo nuk do të thotë që s'do ta bëjmë një ditë", tha ai.

Kurti paralajmëroi gjithashtu krijimin e rezervës vullnetare të FSK-së, ku rezervistët do t'i kenë pajisjet e tyre — "nga çizmet deri tek arma" — të ruajtura në adresa të caktuara nga Forca e Sigurisë së Kosovës. Ai shtoi se sistemi do të kompletohet me programin "edukim për siguri" për shkollat e mesme, i frymëzuar nga shembulli i Polonisë, që u mëson të rinjve reagimet e duhura në raste emergjencash. "Unë besoj që kjo çfarë po bëjmë është shumë më e mirë se shërbimi i detyrueshëm ushtarak", deklaroi Kurti.

Burim: Telegrafi, https://telegrafi.com/sherbim-i-detyrueshem-ushtarak-kurti-do-ta-kemi-modelin-e-mbrojtjes-gjitheperfshirese/
— Redaksia ZHURMA