Kuvendi miraton amnistinë penale, rrëzon tri nisma opozite
Cilat ligje kaluan sot dhe pse opozita doli me duart bosh?
TIRANË — Kuvendi i Shqipërisë miratoi sot amnistinë penale me 84 vota pro, si pjesë e një sërë ligjesh të rëndësishme. Bashkë me të u miratuan edhe ligji "Për sektorin e energjisë elektrike" dhe ligji "Për informacionin elektronik të transportit të mallrave", të dyja me 84 vota.
Plani Strategjik i Kuvendit 2026–2030 u miratua me 82 vota pro. Kuvendi votoi gjithashtu ngritjen e nënkomisionit për Auditimin e Sektorit Publik me kryetar deputetin Igli Cara (84 vota) dhe tri nënkomisione brenda Komisionit për Bujqësinë, Ushqimin dhe Zhvillimin Rural (76 vota).
Opozita doli me duart bosh: me 83 vota kundër u rrëzua nisma e deputetit demokrat Kliti Hoti për ndryshime në Kodin Rrugor. Me 81 vota kundër u refuzua propozimi i ngjashëm i Erald Kaprit nga Partia Mundësia. Me 80 vota kundër u hodh poshtë edhe projektligji i Jorida Tabakut (PD) për sigurimet shoqërore.
Kuvendi ngriti gjithashtu nënkomisionin për Zhvillim të Qëndrueshëm me kryetare Ilva Gjuzi (82 vota), atë për Administratën Publike me kryetar Ermal Pacaj, PS (75 vota), dhe nënkomisionin për Integritetin e Informacionit Publik, Dezinformimin dhe Ndërhyrjet e Huaja me kryetare Iris Luarasi (81 vota).
Seanca e sotme pasqyroi radhitjen e pushtetit: shumica parlamentare çoi deri në fund nismët e veta, ndërkohë që asnjë nga tri nismat e opozitës nuk gjeti mbështetjen numerike.
Burim: ATSH
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.