Si do ta stabilizojë Ali Ademi mesfushën e Llapit?
Mesfushori defanziv nga Maqedonia e Veriut ka nënshkruar kontratë deri në vitin 2028 me klubin llapjan pas një karriere në Maqedoni e Greqi.
PODUJEVË — Klubi i futbollit Llapi ka zyrtarizuar transferimin e mesfushorit defanziv nga Maqedonia e Veriut, Ali Ademit. Sipas njoftimit të publikuar të premten mbrëma nga klubi llapjan, 26-vjeçari ka nënshkruar një kontratë që do ta mbajë atë te skuadra e Llapit deri në verën e vitit 2028, me opsionin për të vazhduar marrëveshjen edhe për një vit tjetër.
Mesfushori 26-vjeçar së fundmi luajti për klubin Makedonija Gjorçe Petrov në kampionatin e tij vendor. Përveç kësaj, ai ka bërë karrierë të suksesshme edhe në skuadra të tjera të njohura si Shkupi, Flamurtari, Vardari, si dhe në Greqi te skuadra e Aris Thessaloniki, duke fituar një përvojë të konsiderueshme në reparte të ndryshme defensive.
Në njoftimin zyrtar të klubit thuhet se pas disa ndryshimeve në skuadër në repartin e mesfushës, Ademi pritet të sjellë stabilitet dhe cilësi shtesë për ekipin. Me këtë përforcim, Llapi vazhdon ndërtimin e skuadrës për sezonin e ri 2026/27, me synimin për të qenë sa më konkurrues në të gjitha garat. Ademi po ashtu numëron edhe një paraqitje me Përfaqësuesen e Maqedonisë së Veriut.
Burim: Koha.net
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.