Pse nafta në Shqipëri kushton 10.5% mbi mesataren e BE?

TIRANË — Karburanti në Shqipëri i kushton konsumatorëve 10.5% më shumë se mesatarja e Bashkimit Europian, sipas të dhënave të Eurostat për vitin 2025. Indeksi PPP (Purchasing Power Parities) për kategorinë e karburanteve u mat në 110.5 — çka do të thotë se për të njëjtën sasi, ku europiani shpenzon 100 euro, shqiptari paguan 110.5 euro.

Paradoksi është i prerë: Shqipëria renditet ndër vendet më të varfra të Europës, me të ardhura për frymë vetëm 43% të mesatares së BE-së dhe konsum individual 48%. E megjithatë, ata që kanë makinë detyrohen të blejnë karburantin me çmime të vendeve shumë më të pasura.

Sipas Eurostat, Shqipëria renditet e pesta në Europë për çmimet e shtrenjta të karburantit sipas fuqisë blerëse, pas Islandës (128.4%), Danimarkës (114.7), Holandës (114) dhe Zvicrës (113.7). Në rajon, Serbia qëndron në 96.1, Mali i Zi në 85.6, Bosnja në 76.3, ndërsa Maqedonia e Veriut — ku furnizohen shumë shqiptarë — është në 72.

Hendeku ka ardhur në rritje vazhdimisht. Çmimet shqiptare kapën mesataren e BE-së në 2022–2023, u ngjitën në 106.6 në 2024 dhe thelluan diferencën në 110.5 gjatë 2025-ës. Në fillim të 2026-ës diferenca u zgjerua edhe më shumë: vendet e rajonit ulën barrën fiskale mbi karburantet, ndërsa qeveria shqiptare zbatoi ulje të akcizës për vetëm 5 ditë.

Arsyeja kryesore qëndron te taksat: ato përbëjnë rreth 50% të çmimit të një litri karburant në Shqipëri, ndërsa në vendet e tjera të rajonit ky raport qëndron në 30–35%. Të dhënat për Kosovën mungojnë në raportin e Eurostat.

Burim: Gazeta Express
— Redaksia ZHURMA