Pse thellohet bashkëpunimi i policive shqiptare e italiane?

TIRANË — Drejtori i Përgjithshëm i Policisë së Shtetit, Skender Hita, ka zhvilluar një takim me drejtues të lartë të Policisë italiane, ku u vlerësua niveli i lartë i bashkëpunimit mes dy institucioneve në luftën kundër krimit të organizuar, trafikimit të narkotikëve, pastrimit të produkteve të veprës penale dhe kapjes së shtetasve në kërkim ndërkombëtar.

Në takim morën pjesë Lorenzo Bucossi, Drejtori i Shërbimit për Bashkëpunimin Policor Ndërkombëtar të Policisë italiane, dhe Marco Cali, Drejtori i Shërbimit Qendror Operativ të Policisë së Shtetit italian.

Sipas njoftimit zyrtar, policia shqiptare ka numrin më të madh të skuadrave të përbashkëta hetimore me autoritetet italiane, tregues që dëshmon nivelin e lartë të besimit reciprok. Palët vlerësuan bashkëpunimin për monitorimin ajror dhe goditjen e kultivimit të bimëve narkotike, model që ka dhënë rezultate të prekshme dhe është vlerësuar nga partnerët ndërkombëtarë.

Hita shprehu mirënjohjen për mbështetjen italiane në forcimin e aftësive profesionale, përfshirë ndihmën për Akademinë e Sigurisë përmes literaturës profesionale dhe shkëmbimit të praktikave më të mira në edukimin policor.

Palët riafirmuan angazhimin për forcimin e partneritetit strategjik, rritjen e shkëmbimit të informacionit dhe zhvillimin e iniciativave të reja të përbashkëta për sfidat e sigurisë me karakter ndërkombëtar.

Burim: IndeksOnline
— Redaksia ZHURMA