Pse ndikon vera e kuqe si afrodiziak në jetën seksuale?

ZYRIH — Lidhja e hershme midis konsumit të alkoolit dhe romancës nuk është thjesht një perceptim shoqëror, por ka bazë shkencore dhe shqisore. Eksperti shqiptar i vreshtarisë dhe verarisë në Zvicër, Rexhep Kryeziu, së bashku me specialisten Shirley Amberg, shpjegojnë se si aromat, kujtesa nuhatëse dhe sasia e duhur e verës luajnë një rol përcaktues.

Sipas specialistes Shirley Amberg, pirja e verës ndikon në uljen e vetëpërmbajtjes dhe frenimeve tona të zakonshme shoqërore. Kjo na mundëson të nisim biseda që normalisht nuk do t'i bënim, por teprimi mund të sjellë pendim të madh të nesërmen.

Përtej efekteve të thjeshta psikologjike të çlirimit të ngarkesës emocionale, ekzistojnë prova të shumta shkencore. Studimet e kryera tregojnë se personat që konsumojnë verë rregullisht kanë dëshirë më të lartë seksuale dhe përjetojnë më shumë kënaqësi gjatë aktit sesa ata që nuk pinë alkool.

Nga të gjitha pijet alkoolike të analizuara në kërkime, vera e kuqe ka rezultuar si më efektivja për stimulim. Megjithatë, moderimi është çelësi, pasi vetëm një ose dy gota janë të mjaftueshme për të stimuluar shqisat, ndërsa sasia e tepërt shkakton depresion ose pamundësi fizike te burrat.

Për sa u përket aromave, gratë joshen më shumë nga tonet e myshkut, tokës, drurit, likoricës dhe qershisë. Këto profile aromatike përputhen shumë me verërat e kuqe si Vrançi, Burgundezi i zi, Katerushi, Kallmeti, Serini apo Merlot, të cilat nxisin në mënyrë të natyrshme shqisën e nuhatjes.

Nga ana tjetër, burnat magjepsen nga aromat e livandos, karamelit, gjalpit, portokallit, erëzave të ëmbla dhe vaniljes. Këto veti gjenden te shampanja, verërat rozë, Sherry, Port, Moscato, Grenache apo Syrah, duke krijuar një ndjesi të ngrohtë që nxit dëshirën për afrim e intimitet.

Në fund, kujtesa jonë nuhatëse na kushtëzon në mënyrë të pavetëdijshme, duke lidhur aromat e verërave me netët e kaluara të zjarrta. Përjetimet e mëparshme intime mund të nxisin ngazëllim shumë vite më vonë, prandaj ekspertët rekomandojnë që gjithmonë t'i kushtohet kohë nuhatjes së verës.

Burim: Telegrafi
— Redaksia ZHURMA