Pse punëtorët e RTK-së kërkojnë shkarkimin e Rilind Gërvallës?

PRISHTINË — Brenda Radiotelevizionit të Kosovës (RTK) ka nisur një peticion për shkarkimin e drejtorit të përgjithshëm, Rilind Gërvalla, pas deklaratave të tij kundër sindikatave. Në email-et e siguruara nga Nacionale, punëtorët akuzojnë Gërvallën për sulm ndaj sindikatave, pavarësisht angazhimit të tij të kaluar politik me Lëvizjen Vetëvendosje.

Punëtorët kërkojnë përgjigje për emërimet në pozita drejtuese, duke pyetur: sipas cilave kritere u emërua Dardan Ramabaja në krye të mediave online? A ka mbizotëruar meritokracia, apo afërsia me menaxhmentin? Ata pretendojnë se ekzistojnë trajtime të pabarabarta, aneks-kontrata dhe favore për persona të afërt me drejtuesit.

Në email thuhet se drejtori, në vend që të dialogojë me sindikatat, i sulmon ato, duke dëshmuar se ka humbur besimin e punëtorëve. "RTK nuk mund të jetë pronë e një grupi, partie apo rrethi shoqëror. Ajo u takon qytetarëve dhe punëtorëve të saj," shkruhet në reagim.

Gërvalla, në një status të publikuar të premten, akuzoi sindikatat për politizim, duke pretenduar se ato janë bërë instrument i partive politike. "Nga një sindikatë u bënë dy, nga dy u bënë tri, dhe ndarjet shpesh janë rezultat i ndikimeve të jashtme," shkroi ai, duke shtuar se sindikatat shpesh shërbejnë si mjet presioni për agjenda që nuk lidhen me punëtorët.

Punëtorët kërkojnë transparencë dhe demantim me dokumente për akuzat e trajtimit të pabarabartë. Ata theksojnë se Bordi i RTK-së duhet të marrë përgjegjësi, pasi drejtori po diskrediton sindikatat në vend që të adresojë problemet e institucionit.

Peticioni synon të kërkojë përgjegjësi nga drejtuesit e RTK-së, duke argumentuar se dialogu me sindikatat është i domosdoshëm. "Kur një drejtor sulmon sindikatat, ai nuk po mbron institucionin," thuhet në email.

Burim: Nacionale
— Redaksia ZHURMA