Pse qeveria nxirret nga debati për raportin e PE-së në Kuvend?

TIRANË — Partia Demokratike ka kërkuar zhvillimin e një mocioni me debat në lidhje me protestën e qytetarëve dhe raportin e Parlamentit Europian për Shqipërinë, duke shkaktuar përplasje të ashpër politike në Konferencën e Kryetarëve. Deputetja Jorida Tabaku deklaroi se Kuvendi është totalisht jashtë realitetit, ndërkohë që protestuesit prej 25 ditësh kërkojnë largimin e qeverisë.

Tabaku theksoi se zëri i protestës ka arritur deri në institucionet europiane, duke u reflektuar në raportet e fundit të PE-së. "Njëzet deputetë të Parlamentit Europian flasin për protestën në Shqipëri, ndërkohë që askush nga ju nuk ka thënë qoftë edhe një fjalë," tha ajo drejtuar mazhorancës.

Kreu i grupit parlamentar të PD-së, Gazment Bardhi, akuzoi qeverinë se po shmang debatin parlamentar mbi dokumentin e PE-së, i cili ngre shqetësime serioze për korrupsionin, ligjet klienteliste dhe lirinë e medias. Ai tha se raporti përmban kritika të forta, përfshirë edhe ato lidhur me mbrojtjen politike të korrupsionit të Belinda Ballukut.

Bardhi shpjegoi se qeveria kishte njoftuar më parë se debati do të zhvillohet pasi raporti të miratohet në PE. "Tani që raporti është miratuar, thotë se nuk mund të zhvillohet," tha ai, duke akuzuar mazhorancën se fshihet pas "vrimës së çelësit" dhe denigrimit të protestuesve.

Ai theksoi se opozita nuk synon të përfaqësojë protestën, por të përcjellë shqetësimet e qytetarëve. "Nuk jemi ne si ju, që çdo ditë fshiheni pas vrimës së çelësit dhe denigroni vajza e gra që protestojnë," tha Bardhi, duke shtuar se edhe përfaqësues të PE-së kanë ngritur alarme mbi situatën në vend.

Tabaku u përgjigj kritikave duke thënë se mazhoranca po mundohet ta paraqesë raportin si një "medalje" për qeverinë. "Atëherë pse fshiheni?" pyeti ajo, duke insistuar se Kuvendi ka detyrimin që të zhvillojë debat të plotë nëse integrimi europian trajtohet seriozisht.

Burim: BalkanWeb
— Redaksia ZHURMA