Si ka ndikuar 'Qyteti i Sigurt' në uljen e aksidenteve të trafikut?

SHKUP — Ministri i Punëve të Brendshme, Pançe Toshkovski, prezantoi raportin për punën e tij dyvjeçare në krye të Ministrisë së Brendshme, duke theksuar ndikimin e sistemit 'Qyteti i Sigurt'.

Sipas tij, që nga vendosja e sistemit për 5 muaj, deri në 22 qershor 2026, janë regjistruar 120.000 shkelje trafiku, nga të cilat 95% janë për tejkalim të shpejtësisë së lejuar. Ky sistem, i cili nisi zbatimin në Shkup, Tetovë dhe Kumanovë, ka ulur numrin e aksidenteve të trafikut për rreth 40%: nga 55 viktima në të njëjtën periudhë të vitit të kaluar, kanë ndërruar jetë 34 persona.

Për këto dy vjet, efikasiteti i Ministrisë së Brendshme është rritur për 69%, me rritje të numrit të kapjes së autorëve të veprave penale. Janë neutralizuar rreth 30 grupe kriminale në fusha të ndryshme. Në fushën e korrupsionit, janë neutralizuar gjashtë grupe të organizuara kriminale, me ngritjen e kallëzimeve penale për 146 persona fizik dhe 18 subjekte juridike. Janë zbuluar rreth 500 vepra penale, dhe numri i autorëve ka tejkaluar 1.000, duke shënuar rritje të konsiderueshme.

Lidhur me tregtinë e paligjshme të drogës, ministri tha se janë neutralizuar 11 grupe kriminale, parandaluar 9 transporte ndërkombëtare të marihuanës dhe kokainës, dhe zbuluar tre laboratorë të improvizuar. Janë zbuluar mbi 1.600 vepra penale, raportuar rreth 1.900 autorë, dhe sekuestruar rreth 6.2 ton drogë, me rritje të sekuestrimit të kokainës me më shumë se 300%. Gjithashtu, janë sekuestruar 550 armë.

Numri i vjedhjeve të rënda është ulur me më shumë se 30%, grabitjet me mbi 40%, dhe vrasjet me 4%. Gjatë kësaj periudhe, kundër ministrit janë ngritur 3 interpelanca nga opozita, të cilat kaluan pa sukses.

Burim: Shenja
— Redaksia ZHURMA