Çfarë thotë Rama për protestuesit e 18 ditëve?

TIRANË — Kryeministri Edi Rama ka sulmuar sërish protestuesit që prej 18 ditësh kërkojnë dorëheqjen e tij dhe largimin e qeverisë, duke i quajtur në një postim në rrjetet sociale "ekstremistë që kërkojnë pushtet nga rruga".

"Një nga mësimet e vyera të historisë është se ekstremizmi e kërkon pushtetin duke filluar me rrugën," shkruan Rama.

Postimi krahason protestën aktuale me lëvizjet ekstremiste të Europës së paraluftës. Ai përshkruan një skemë: një grup që vendos se ka të drejtë të frikësojë të tjerët "për hir të atdheut", ku britma zë vendin e argumentit dhe rrethimi zë vendin e dialogut.

"Intimidimi paraqitet si aktivizëm dhe linçimi publik i tradhëtarëve si drejtësi e Zotit në emër të popullit," vazhdon Rama, duke shtuar se "kështu vepruan lëvizjet ekstremiste në Europën e paraluftës dhe kështu bëjnë edhe sot."

Kryeministri fokusohet te "turma dixhitale" që "shumëfishon frikën dhe presionin", duke e rritur "eksponencialisht presionin mbi hapësirën demokratike falë rrugëve pa kontroll të internetit". Sipas tij, kush nuk mendon si turma "bëhet objekt i bullizmit masiv online, i fyerjeve, kërcënimeve, linçimit publik dhe fushatave të organizuara të damkosjes".

"Qëllimi nuk është debati. Qëllimi është heshtja," përfundon Rama, duke pretenduar se krijohet "një klimë ku njerëzit zgjedhin të heshtin, jo sepse nuk kanë ç'të thonë, por sepse kostoja e të folurit bëhet shumë e lartë."

Në postimin e tij, Rama citon historianët të cilët "bien dakord se terrori i rrugës fillon me akte që duken 'të vogla', me sharje, intimidim, poshtërim publik, marshime rrugësh automobilistike dhe sulme të përzgjedhura ndaj individëve".

Videoja e bashkangjitur, nga qendra e Tiranës mbrëmë (17 Qershor 2026), sipas tij, është "një tjetër pasqyrë ku mund të shihet çdokush që sheh qytetari demokratike në fjalorin e kësaj proteste, që nga tribuna e sharjeve, tek koret e linçimeve dhe ulërimat e marshuesve". Krahasimi me historinë e errët europiane vjen në ditën e 18-të të protestës jopartiake në Tiranë.

Burim: BalkanWeb
— Redaksia ZHURMA