Çfarë synon Rama në Konferencën e Rindërtimit të Ukrainës?

GDANSK — Kryeministri Edi Rama do të jetë i pranishëm në Konferencën për Rindërtimin e Ukrainës më 25-26 qershor në Gdansk të Polonisë. Forumi do të sjellë bashkë kryetarët e shteteve dhe qeverive, përfaqësues të institucioneve financiare ndërkombëtare, liderë të biznesit dhe organizatave të shoqërisë civile nga e gjithë bota.

Konferenca synon të fortësojë mbështetjen ndërkombëtare për Ukrainën dhe të mobilizojë investime të konsiderueshme për rindërtimin dhe zhvillimin afatgjatë të vendit. Ky forum bashkon fuqitë botërore në një thirrje të përbashkët për solidaritet, ndihmë dhe rikonstruksion të një vendi të dëmtuar rëndë nga lufta.

Punimet e konferencës do të fokusohen në sektorët më të prekur nga agresioni rus, përfshirë energjinë, infrastrukturën kritike dhe logjistikën. Në qendër të agjendës është edhe forcimi i kapaciteteve të sigurisë dhe mbrojtjes, të konsideruar thelbësore për procesin e rindërtimit të Ukrainës.

Rama do të pritet nga homologu i tij polak, Donald Tusk, dhe do të marrë pjesë në ceremoninë zyrtare të hapjes. Sipas agjendës, kryeministri do të mbajë një fjalim përshëndetës në sesionin e dytë plenar të konferencës.

Gjatë qëndrimit në Gdansk, Rama do të zhvillojë një sërë takimesh dypalëshe me homologë ndërkombëtarë, si dhe me Komisioneren e Bashkimit Evropian për Zgjerimin, Marta Kos. Këto diskutime do të adresojnë çështje me interes strategjik për Shqipërinë dhe bashkëpunimin rajonal.

Delegacioni do të takohet gjithashtu me drejtues të kompanive ndërkombëtare, me fokus në energji dhe investime. Këto biseda synojnë nxitjen e bashkëpunimit ekonomik dhe hapjen e mundësive të reja për zhvillim dhe bashkëpunim në fushën e rindërtimit.

Burim: Euronews Albania
— Redaksia ZHURMA