Si e cilëson Rama qeverisjen gjashtëvjeçare të Kurtit?
Kryetari i Prishtinës akuzon kryeministrin në detyrë për deficit politik dhe personal, duke e krahasuar qeverisjen gjashtëvjeçare me varfëri e stagnim.
PRISHTINË — Kryetari i Prishtinës, Përparim Rama, ka akuzuar kryeministrin në detyrë, Albin Kurti, se mungesën e kontributit në luftën çlirimtare dhe në ndërtimin e institucioneve të Kosovës po përpiqet ta mbulojë me propagandë politike.
Në një shkrim në Facebook të martën, Rama deklaroi se "Albin Kurti ka deficit të madh politik dhe personal, sepse nuk ka asnjë kontribut as në luftën çlirimtare dhe as në ndërtimin e institucioneve të Republikës së Kosovës". Ai akuzoi Kurtin se në vazhdimësi sulmon figurat e Ushtrisë Çlirimtare të Kosovës, duke i quajtur ata "hajna" dhe "kriminelë", dhe se po tenton të përfshijë familjet atdhetare në diskursin e fushatës politike.
Sipas Ramës, qeverisja gjashtëvjeçare e Kurtit nuk ka sjellë zhvillim konkret. "Për gjashtë vjet në pushtet, e ka zhytur vendin në varfëri dhe stagnim. Pa asnjë projekt madhor, pa zhvillim kapital dhe pa asnjë rezultat konkret. Asnjë. Zero", u shpreh ai. Ai shtoi se Kurti vazhdon të mbështetet në propagandë dhe retorikë politike, duke pyetur: "Të shohim me çfarë do të vendosë ta vazhdojë fushatën: me ndonjë kërcënim për jetë, me ndonjë premtim për mërgatën apo me një tjetër episod patriotik propagandues me Serbinë".
Rama i bëri thirrje Kurtit të ofrojë program, zhvillim dhe mirëqenie për qytetarët, duke pretenduar se raportet ndërkombëtare tregojnë varfërimin e qytetarëve gjatë kësaj periudhe qeverisëse.
Burim: Koha.net
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.