Si nis Shqipëria epokën Maran me Izraelin?
Kombëtarja shqiptare zhvillon sonte ndeshjen e parë nën drejtimin e trajnerit të ri italian, në orën 20:00.
TIRANË — Kombëtarja e Shqipërisë do të zhvillojë sonte ndeshjen e parë nën drejtimin e trajnerit të ri, Rolando Maran. Kuqezinjtë do të përballen me Izraelin në stadiumin "Air Albania", me ndeshjen që nis në orën 20:00.
Takimi vjen pas zhgënjimit të eliminimit në "play-off"-in e Kupës së Botës, që solli largimin e trajnerit Sylvinho. Federata Shqiptare e Futbollit vendosi t'ia besojë punën trajnerit italian me shpresën për t'i rikthyer kuqezinjtë te rezultatet pozitive dhe për të ndërtuar një skuadër konkurruese për sfidat e ardhshme në Ligën e Kombeve.
Interesimi për këtë takim nuk pritet të jetë i lartë. Në stadium pritet të jenë të hapura vetëm sektorët e katit të parë, ndërsa kati i dytë me shumë gjasa do të mbetet i mbyllur.
Historiku i përballjeve mes dy skuadrave favorizon Izraelin. Nga gjashtë ndeshjet e mëparshme, izraelitët kanë katër fitore dhe Shqipëria dy — asnjëra nuk ka përfunduar barazim. Takimi i fundit në kuadër të Ligës së Kombeve në 2018 u mbyll me fitoren 2-0 të Izraelit në shtëpinë e vet, pas suksesit 1-0 të Shqipërisë në Tiranë.
Burim: Zëri, http://www.zeri.info/sport/625170/shqiperia-nis-epoken-maran-sonte-miqesore-ndaj-izraelit-ne-air-albania/
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.