Si do të paguhen punëtorët e RTK-së pas përmbarimit të 1 milion eurove?
Transmetuesi publik kërkon 1.4 milion euro hua nga Ministria e Financave për të mbuluar pagat e 680 punëtorëve.
PRISHTINË — Sindikata e Pavarur e RTK-së dhe Shoqata Sindikale e Radio Kosovës kanë shprehur shqetësim të thellë për gjendjen financiare të Radio Televizioni i Kosovës, pas ekzekutimit të mbi 1 milion eurove përmes procedurave përmbarimore në rastin e emisionit “Milioneri”.
Sipas sindikatave, ky zhvillim e ka vendosur transmetuesin publik në situatë serioze financiare, duke rrezikuar funksionimin normal të institucionit dhe sigurinë ekonomike të rreth 680 punëtorëve. Pas mbledhjes së Bordit të RTK-së, është bërë e ditur se institucioni i është drejtuar Ministrisë së Financave me kërkesa urgjente për tejkalimin e situatës.
“Fillimisht është paraqitur kërkesë për mbështetje financiare, ndërsa më pas edhe kërkesë për huadhënie në vlerë prej 1.4 milion euro për mbulimin e pagave dhe shpenzimeve të tjera operative”, thuhet në njoftimin e sindikatave. Ato theksojnë se “pagat, të drejtat e punës dhe siguria sociale e punëtorëve nuk guxojnë të trajtohen si kategori e negociueshme”.
Sindikatat i bëjnë thirrje Bordit të RTK-së, menaxhmentit dhe institucioneve shtetërore të ndërmarrin masa urgjente për të garantuar vazhdimësinë financiare të transmetuesit publik, duke paralajmëruar se do të përdorin të gjitha mjetet sindikale për mbrojtjen e të drejtave të punëtorëve.
Burim: Telegrafi
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.