Temperaturat deri në 42°C dhe rrezik ekstrem zjarresh këtë verë në Maqedoni

SHKUP — Temperaturat mbi mesataren do të dominojnë verën 2026 në Maqedoni, me valë të shumta dhe intensive të nxehtisi, paralajmëron profesori i meteorologjisë dr. Vlado Spiridonov në analizën e tij më të re për Këshillin e Sigurisë.

Spiridonov, i cili është anëtar i Këshillit të Sigurisë dhe profesor në Fakultetin e Shkencave Natyrore dhe Matematikore, thekson se gjatë periudhave më të nxehta temperaturat mund të arrijnë lokalisht mbi 40°C. Në zonat më të ekspozuara, si lugina e Vardarit, Pellgu i Shkupit, Pellagonia dhe pjesët lindore, nuk përjashtohen vlera deri në 42°C, madje edhe më të larta.

Në mjediset urbane, veçanërisht në Shkup, efekti i temperaturave të larta do të jetë i theksuar edhe gjatë natës. Sipërfaqet e asfaltuara, vegjetacioni i reduktuar dhe dendësia urbane do të ndikojnë në shëndetin e njerëzve me sëmundje kardiovaskulare dhe respiratore, si dhe do të shkaktojnë çrregullime të gjumit dhe ulje të produktivitetit.

Këto zhvillime janë rezultat i El Ninjos, shpjegon Spiridonov për MIA. Ndikimi i tij lidhet me forcimin e ekstremeve të motit, duke përfshirë valë më intensive të nxehtit, periudha të zgjatura thatësire, por edhe reshje intensive dhe përmbytje. Copernicus Climate Change Service e veçon Evropën Juglindore si një nga rajonet më të nxehta në Evropë gjatë verës 2026.

Organizata Botërore Meteorologjike njoftoi se ekziston rreth 80 për qind probabilitet për zhvillimin e El Ninjos gjatë qershor-gusht, ndërsa për shtator-dhjetor probabiliteti rritet në rreth 90 për qind. Fenomeni pritet të arrijë intensitet mesatar deri në të fortë.

Rreziku nga zjarret pyjore rritet ndjeshëm dhe mund të kalojë në nivel të lartë deri ekstrem. Veçanërisht kritike janë lugina e Vardarit, Tikveshi, Pellgu i Gjevgjelisë-Valandovës, rajoni i Strumicës dhe pjesë të Maqedonisë Lindore. Sipas llogaritjeve të Spiridonov, vlera mesatare e Indeksit Standard të të Reshurave është afërsisht -1.5, çka tregon për thatësirë mesatare deri intensive.

Parashikimet në kohë dhe sistemet e paralajmërimit të hershëm janë kyçe për zvogëlimin e rreziqeve, veçanërisht në sektorë si bujqësia, energjetika dhe shëndeti publik. Vera do të karakterizohet nga periudha më të gjata thatësie, reshje të pakta dhe stres më të madh hidrik — një kombinim që e bën Maqedoninë zonë ku efektet e nxehtësisë ekstreme mund të jenë edhe më të theksuara se në rajon.

Burim: Tetova Sot
— Redaksia ZHURMA