Pse u ndaluan trotinetët elektrikë për persona nën 18 vjeç?

SHKUP — Kuvendi i Maqedonisë së Veriut miratoi Ligjin për rregullimin e përdorimit të trotinetëve elektrikë, duke vendosur rregulla më të rrepta për qarkullimin e tyre dhe rritjen e sigurisë në komunikacion. Ligji parashikon që trotinetët elektrikë të mund të përdoren vetëm nga personat mbi 18 vjeç.

Përveç kufizimeve të moshës, ligji sjell edhe rregulla të qarta për mënyrën e përdorimit, me qëllim uljen e aksidenteve në trafik. Do të parashikohen masa më të ashpra ndëshkimore për shkeljet, përfshirë tejkalimin e shpejtësisë, drejtimin nën ndikimin e alkoolit, si dhe bartjen e personave të tjerë në trotinet.

Autoritetet theksojnë se qëllimi i ndryshimeve është rritja e sigurisë rrugore, pasi statistikat tregojnë numër të shtuar të aksidenteve me përfshirjen e trotinetëve dhe mjeteve të ngjashme, përfshirë lëndime të rënda dhe raste fatale. Me ligjin e ri synohet ulja e aksidenteve dhe rregullimi më i qartë i përdorimit të këtyre mjeteve, të cilat janë bërë gjithnjë e më të pranishme në komunikacionin urban.

Burim: Shenja
— Redaksia ZHURMA