AC Milan Junior Camp: Çfarë sjell edicioni i dytë në Prishtinë?
Pas suksesit të vitit të kaluar, qindra fëmijë kosovarë do të stërviten në Bermicë nga trajnerët e akademisë së AC Milan.
PRISHTINË — Në sheshin “Zahir Pajaziti”, në kuadër të hapësirës së Prishtina Football Fest ku po transmetohen ndeshjet e FIFA World Cup 2026, është hapur zyrtarisht edicioni i dytë i AC Milan Junior Camp Prishtina. Ky projekt i rëndësishëm sportiv për grupmoshat e reja do të mbahet nga data 22 deri më 26 qershor 2026.
Gjatë pesë ditëve të stërvitjeve, qindra fëmijë do të angazhohen në fushat e Kompleksit Sportiv në Bermicë nën drejtimin e trajnerëve zyrtarë të AC Milan Academy. Ata do të përfitojnë njohuri teknike, taktike dhe edukative të bazuara plotësisht në filozofinë dhe metodologjinë e klubit të njohur italian.
Ky edicion vjen pas një viti historik për projektin, ku pjesëmarrësit e parë patën mundësinë të përjetonin programin “Milan Experience” në Itali. Aty ata u stërvitën në ambientet zyrtare të klubit kuqezi në Milano dhe u takuan me figura shumë të njohura të këtij gjiganti të futbollit botëror.
Organizatorët vlerësuan interesimin e jashtëzakonshëm të prindërve dhe fëmijëve për këtë platformë reale të zhvillimit të talenteve të reja në Kosovë. Kampit do t’i vendoset pika përmbyllëse më 26 qershor në Bermicë, përmes një ceremonie të veçantë ku do të bëhet edhe ndarja e certifikatave për fëmijët pjesëmarrës.
Burim: Telegrafi
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.