Pse AKP transferoi 200 mijë hektarë pyje në Ministrinë e Bujqësisë?
Marrëveshja e pranim-dorëzimit përjashton asetet nga privatizimi dhe i kalon atyre menaxhimit institucional.
PRISHTINË — Agjencia Kosovare e Privatizimit (AKP) dhe Ministria e Bujqësisë, Pylltarisë dhe Zhvillimit Rural kanë nënshkruar marrëveshjen e pranim-dorëzimit për transferimin e Ekonomive Pyjore dhe Ekonomive të Gjuetisë. Nënshkrimet i vunë kryetari i Bordit të AKP-së Hekuran Nikçi, drejtori ekzekutiv në detyrë Burim Leci, ministri Armend Muja dhe drejtori në detyrë i Agjencisë së Pyjeve të Kosovës, Menderez Ibra.
Transferimi përfshin rreth 200 mijë hektarë prona pyjore të shpërndara në 3,015 parcela, deri më tani nën menaxhimin e AKP-së. Ministrisë iu dorëzua gjithashtu dokumentacioni i plotë me listën e aseteve dhe parcelat e evidentuara, të cilat pas përfundimit të procedurave kadastrale pritet të bëhen publike.
Vendimi për bartjen e 22 Ekonomive Pyjore dhe dy Ndërmarrjeve Pyjore Industriale është marrë nga Bordi i AKP-së, bazuar në Ligjin e AKP-së Nr. 04/L-034 dhe Ligjin Nr. 08/L-137 për Pyjet. AKP njofton se do të formohen komisione të përbashkëta me Agjencinë Pyjore të Kosovës për verifikimin dhe transferimin e pronësisë në emër të Qeverisë së Kosovës.
Burim: Zëri
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.