Si të shmangen helmimet ushqimore gjatë temperaturave të larta?

PRISHTINË — Agjencia e Ushqimit dhe Veterinarisë (AUV) ka lëshuar një thirrje urgjente për rritjen e kujdesit në trajtimin e produkteve ushqimore. Ky paralajmërim vjen në një moment kur temperaturat po rriten ndjeshëm, duke rritur rrezikun për shëndetin publik.

Subjektet e zinxhirit ushqimor, nga prodhimi dhe përpunimi deri te tregtimi, janë të obliguara të zbatojnë me përpikëri kërkesat ligjore. AUV thekson se siguria ushqimore nuk është vetëm detyrim administrativ, por një përgjegjësi e përbashkët mes biznesit dhe qytetarit.

Veçanërisht janë në qendër të vëmendjes bizneset e gastronomisë, si restorantet, hotelet, sallat e dasmave dhe fast-food-et. Këto subjekte duhet të sigurojnë që produktet të ruhen në temperaturat e përcaktuara në etiketë dhe të kontrollojnë rregullisht pajisjet ftohëse.

Agjencia u kërkon konsumatorëve të kenë kujdes të shtuar gjatë blerjes dhe transportit të produkteve deri në shtëpi. Ruajtja në kushte të përshtatshme deri në momentin e konsumimit është kyçe për të parandaluar raste të helmimeve, sidomos për produktet me prejardhje shtazore.

Sipas njoftimit të datës 26 qershor, jetëgjatësia e produkteve varet drejtpërdrejt nga kushtet e ruajtjes. Produktet shtazore mbeten më të ndjeshme ndaj nxehësisë, por AUV këshillon leximin e deklaracionit të çdo produkti për të respektuar temperaturat specifike të kërkuara.

Për të garantuar zbatimin e këtyre rregullave, AUV ka paralajmëruar rritjen e kontrolleve në terren gjatë sezonit të verës. Agjencia ka qenë e prerë në deklaratën e saj: shkeljet e standardeve të sigurisë ushqimore nuk do të tolerohen.

Këto masa vijnë në një kohë kur Insituti Hidrometeorologjik i Kosovës (IHMK) ka paralajmëruar temperaturat maksimale deri në 33 gradë Celsius gjatë kësaj fundjave. Respektimi i rregullave është mjeti i vetëm për të mbrojtur shëndetin e qytetarëve.

Burim: Kallxo
— Redaksia ZHURMA